ឯកឧត្តម អ៊ុ រាត្រី អភិបាលខេត្តបន្ទាយមានជ័យ និងលោកជំទាវ ជ័យ ណារី អ៊ុ រាត្រី បានអញ្ជើញចូលរួមក្បួនដង្ហែយ៉ាងអធិកអធម នៃការរៀបចំប្រារព្វពិធីបុណ្យវិសាខបូជា នៅវត្តធម្មសាមគ្គីពង្រ ក្រុងសិរីសោភ័ណ  ក្នុងខេត្តបន្ទាយមានជ័យ ជាមួយព្រះឧត្តមសីលញាណ ធុល សុធា ព្រះរាជាគណៈថ្នាក់កិត្តយស ព្រះមេគណខេត្ត មន្ត្រីសង្ឃគ្រប់ឋានានុក្រម ថ្នាក់ដឹកនាំមន្ទីរអង្គភាព លោក ហ៊ឹល រ៉ាយ៉ា អភិបាលក្រុង មន្ត្រីរាជការ ប្រជាពុទ្ធបរិស័ទ សីលវ័ន សីលវត្តីយ៉ាងច្រើនកុះករ ក្បួនដង្ហែរ ចេញពីវត្តធម្មសាមគ្គីពង្រ ភូមិពង្រ ឆ្ពោះតាមផ្លូវជាតិលេខ៥៦ និងក្នុងបរិវេណទីរួមខេត្ត បន្តឆ្ពោះមកកាន់ទីអារាមវិញ ដើម្បីរៀបចំពិធីបុណ្យវិសាខបូជា និងបំបួសកុលបុត្រ ២៥០អង្គ នារសៀលថ្ងៃសៅរ៍ ១៥កើត ខែពិសាខ ឆ្នាំកុរ ឯកស័ក ពុទ្ធសករាជ ២៥៦២ ត្រូវនឹងថ្ងៃទី១៨ ខែឧសភា ឆ្នាំ២០១៩នេះ។

      បុណ្យវិសាខបូជា គឺជាពិធីបុណ្យសាសនាដ៏សំខាន់បំផុត ក្នុងចំណោមបុណ្យសាសនាជាច្រើនទៀត ពីព្រោះពិធីបុណ្យនេះ គឺបានបង្ហាញនូវការគោរពរំឭកនឹកដល់ព្រឹត្តិការណ៍ធំៗបីនៃសម័យកាលរបស់ព្រះសម្មាសម្ពុទ្ធសមណគោតម គឺជាថ្ងៃដែលព្រះអង្គទ្រង់បានប្រសូត បានត្រាស់ដឹង និងជាថ្ងៃចូលបរិនិព្វានផងដែរ។ ព្រឹត្តិការណ៍ទាំងបីនេះគឺកើតឡើងចំថ្ងៃ ១៥កើត ខែពេញបូណ៌មី ដែលមានព្រះច័ន្ទពេញវង់ ក្នុងខែពិសាខដូចគ្នាខុសតែឆ្នាំតែប៉ុណ្ណោះ៕ រតនា

ប្រភព៖ រដ្ឋបាលខេត្តបន្ទាយមានជ័យ