ប្រជាពលរដ្ឋរងគ្រោះដោយគ្រោះធម្មជាតិខ្យល់កន្រ្តាក់ ចំនួន៨៧គ្រួសារបន្ថែមទៀត នៅឃុំកោងកាង និងឃុំវាលម្លូរ ក្នុងស្រុកពញាក្រែក ទទួលបានអំណោយមនុស្សធម៌ ពីសាខាកាកបាទក្រហមកម្ពុជា ខេត្តត្បូងឃ្មុំ នាព្រឹកថ្ងៃទី១២ ខែឧសភា ឆ្នាំ២០១៩នេះ។
នៅក្នុងឨកាសជួបសំណេះសំណាល ជាមួយបងប្អូន ទាំង ៨៧គ្រួសារ លោកជំទាវ ឡេង សុខា ប្រធានស្តីទីគណៈកម្មាធិការសាខាកាកបាទក្រហមកម្ពុជា ខេត្តត្បូងឃ្មុំ បានលើក
ឡើងថា កាលពីម្សិលមិញកាកបាទក្រហម បាននាំយកអំណោយមនុស្សធម៌ មកចែកជូនបងប្អូន ៦៣គ្រួសារ ដែលបានទទួលរងប៉ះពាល់ដោយគ្រោះខ្យល់កន្ត្រាក់ម្តងរួចមកហើយ ។ នៅថ្ងៃនេះ ទៀត ក្នុងនាមតំណាងជួសមុខឯកឧត្តមបណ្ឌិតជាម ច័ន្ទសោភ័ណ អភិបាលខេត្ត និងក្នុងនាមប្រធានស្តីទីសាខាកាកបាទក្រហមខេត្ត ក៏បាននាំអំណោយមកចែកជូនបងប្អូនបន្ថែម ៨៧គ្រួសារទៀត ដែលបានទទួល រងគ្រោះ ដោយគ្រោះខ្យល់កន្ត្រាក់ដ៍សាហាវនេះ។ មានប្រសាសន៍បន្ត នាឱកាសនោះ លោកជំទាវ ក៏បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេច តែងតែយកចិត្តទុកដាក់ គិតគូរចំពោះសុខទុក្ខរបស់ប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយអ្វីឡើយ។
លោកជំទាវក៏បានសំដែងនូវការសោកស្ដាយផងដែរ ចំពោះការខូចខាតផ្ទះសំបែង និង ទ្រព្យសម្បត្តិ ដែលនេះជាគ្រោះមហន្តរាយគ្មាននរណាម្នាក់ចង់ជួបប្រទះឡើយ និងបានបញ្ជាក់ថា ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មានចំនួនតិចតួច មិនសមល្មមនឹងការខូចខាតរបស់បងប្អូន ក៍ដោយ តែក៏អាចជួយសម្រាលទុក្ខលំបាក របស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសពីកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
លោកជំទាវបានបញ្ជាក់ទៀតថា អំណោយទាំងនេះ បានមកពីការបរិច្ចាគធនធាន របស់សប្បុរស ជន ដែលបានជួយដល់កាកបាទក្រហម តាមរយ:នៃការរៀបចំធ្វើទិវាពិភពលោក កាកបាទក្រហម អឌ្ឍចន្ទ័ក្រហមជារៀងរាល់ឆ្នាំ ដើម្បីប្រមូលថវិកា យកមកធ្វើសកម្មភាពមនុស្សធម៌ជួយដល់ជនរងគ្រោះ នៅក្នុងទូទាំងខេត្តរបស់យើង។ ជាមួយនោះលោកជំទាវ ក៍បានជំរាបជូនបងប្អូនផងដែរថា នៅថ្ងៃទី ២៤ ខែឧសភា ឆ្នាំ២០១៩ ខាងមុខឆាប់ៗនេះ សាខាកាកបាទក្រហមខេត្តនឹងមានរៀបចំប្រារព្វទិវាពិភពលោក កាកបាទក្រហម អឌ្ឍច័ន្ទក្រហមខួបទី ១៥៦ នៅស្នាក់ការសាខាកាកបាទក្រហមកម្ពុជា ខេត្តត្បូងឃ្មុំ ដើម្បីកៀគរប្រមូលថវិកា សំភារ:សំរាប់ធ្វើសកម្មភាពមនុស្សធម៌ជួយដល់ជនរងគ្រោះជាបន្តទៅទៀត។
អំណោយដែលបានផ្តល់ជូននាពេលនេះក្នុង១គ្រួសារៗ មាន :
1-អង្ករ 25 គក្រ 2-ត្រីខ 10 កំប៉ុង 3-ទឹកត្រី 01 យួរ 4-ទឹកស៊ីអ៊ីវ 01 យួរ 5-មី 01 កេះ 6-ទឹកសុទ្ធកម្ពុជា 01 កេះ 7-សំពត់តង់ 01 ផ្ទាំង 8-ថវិកា 200,000 ៛ ដល់អ្នករងគ្រោះធ្ងន់ធ្ងរ 1គ្រួសារ នឹងថវិកា 100,000រៀល សំរាប់អ្នករងគ្រោះមធ្យម 86នាក់ និងកុមារម្នាក់រងរបួសស្រាល ផ្តល់ជូន 100,000 រៀល នឹង ក៏បានផ្តល់រទេះរុញ 1គ្រឿង ដល់លោកយាយពិការជើងដើរមិនរួច តាមការសន្យារបស់ឯកឧត្តមបណ្ឌិត អភិបាលខេត្តផងដែរ៕ មុនីរម្យ
ប្រភព៖ រដ្ឋបាលខេត្តត្បូងឃ្មុំ