នាព្រឹកថ្ងៃពុធ ៥កើត ខែពិសាខ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី៨ ខែឧសភា ឆ្នាំ២០១៩នេះ នៅសាលប្រជុំធំ សាលាខេត្តកែប បានប្រារព្ធខួបអនុស្សាវរីយ៍លើកទី១៣៣ នៃទិវាពលកម្មអន្តរជាតិ ១ឧសភា ឆ្នាំ២០១៩ ក្រោមអធិបតីភាព ឯឧត្តម កែន សត្ថា អភិបាល នៃគណៈអភិបាលខេត្តកែប ឯកឧត្តម សំ សារីន ប្រធានក្រុមប្រឹក្សាខេត្ត ដោយមានការអញ្ជើញចូលរួមពី លោក និងលោកស្រី ជាអភិបាលរងខេត្ត ប្រធានមន្ទីរ អង្គភាពជុំវិញខេត្ត កងកម្លាំងទាំងបី អាជីវករ កម្មករ និយោជិត និងប្រជាពលរដ្ឋជាច្រើននាក់។
ឯកឧត្តម កែន សត្ថា អភិបាលខេត្តកែប បានអានសារលិខិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដោយមានអត្ថន័យថា នេះជាឱកាសមួយដ៏វិសេសវិសាល ដើម្បីវាយតម្លៃអំពីវឌ្ឍនភាពក្នុងភាពជាដៃគូរបស់ព្រះរាជាណាចក្រកម្ពុជា ជាមួយអង្គការអន្តរជាតិខាងការងារ និងក្នុងឋានៈជាប្រទេសសមាជិករបស់អង្គការអន្តរជាតិខាងការងារ ដែលជាទីភ្នាក់ងារត្រីភាគីឯកទេសផ្នែកពិភពការងាររបស់អង្គការសហប្រជាជាតិ ដែលត្រូវបង្កើតនៅឆ្នាំ១៩១៩ ដើម្បីកំណត់បទដ្ឋានការងារ និងរៀបចំគោលនយោបាយនានា ក្នុងគោលបំណងបង្កើនយុតិ្តធម៌សង្គម និងលើកកម្ពស់ការងារសមរម្យសម្រាប់ស្ត្រី និងបុរស។
បន្ថែមពីនេះ រាជរដ្ឋាភិបាលបានអភិវឌ្ឍន៍សេវាការងារធ្វើជូនប្រជាពលរដ្ឋ តាមរយៈទីភ្នាក់ងារជាតិមុខរបរ និងការងារ សម្រាប់ការងារក្នុងប្រទេស និងតាមទីភ្នាក់ងារជ្រើសរើសឯកជនស្របច្បាប់ សម្រាប់ការងារនៅក្រៅប្រទសផងដែរ៕ រតនា
ប្រភព៖ រដ្ឋបាលខេត្តកែប