ឯកឧត្តម អ៊ុន ចាន់ដា អភិបាលខេត្ត និងជាប្រធានគណបញ្ជាការឯកភាពរដ្ឋបាលខេត្តព្រះវិហារ បានបញ្ជាឲ្យកងកម្លាំងទាំងបី ជាពិសេសកម្លាំងស្នងការនគរបាលពង្រឹងការប្រចាំការគ្រប់ម៉ោង ជាពិសេថ្ងៃបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណតិទី៣ នាថ្ងៃខាងមុខនេះ ត្រូវធានាឲ្យបាននូវសន្តិសុខសណ្តាប់ធ្នាប់ល្អ បរិយ៉ាកាសការបោះឆ្នោត មាន ភាពស្ងៀមស្ងាត់ និងដំណើរល្អ ពិសេសត្រូវសហការឲ្យបានជិតស្និតជាមួយ មន្រ្តីរៀបចំការបោះឆ្នោតដែលឈរជើងនៅ តាមមណ្ឌលបោះឆ្នោតទាំងអស់។
នាព្រឹកថ្ងៃពុធ ០៥កើត ខែពិសាខ ឆ្នាំកុរ ឯកស័ក ពស ២៥៦២ ត្រូវនឹងថ្ងៃទី០៨ ខែឧសភា ឆ្នាំ២០១៩ នេះ ឯកឧត្តម បានសង្កត់ធ្ងន់លើបញ្ហាការបង្ក្រាបល្បែងស៊ីសង ដែលជាបញ្ហាចម្បងបង្ករអោយមានអំពើចោរកម្ម និងបទល្មើសផ្សេងៗនៅក្នុងមូលដ្ឋាន ជាពិសេសល្បែងស៊ីសងដែលជ្រកក្រោមស្លាកអាជីវកម្មស្របច្បាប់។ ព្រមទាំងការងារត្រួតពិនិត្យលទ្ធផលការងារប្រចាំខែមេសា និងដាក់ចេញនូវផែនការសកម្មភាពការងារសម្រាប់ខែបន្ទាប់ ។លើសពីនេះទៀតឯកឧត្តមអភិបាលស្នើសុំឲ្យកម្លាំងត្រូវមានផែនការទប់ស្កាត់ កាប្រមូលផ្តុំរបស់ក្រុមខិលខូចដែលមានបំណងធ្វើ ឲ្យបះពាល់ដល់សន្តិសុខសណ្តាប់ធ្នាប់សង្គម ។ហើយឯកឧត្តមបានបញ្ជាក់ពីលទ្ធផលនៃការដោះស្រាយ និងអត្តសញ្ញាណកម្មដីសហគមន៍គូលែនព្រហ្មទេព ដែលត្រូវបានប្រជាពលរដ្ឋទន្រ្ទានកាន់កាប់កន្លងមក ។
កិច្ចប្រជុំនេះប្រព្រឹត្តិទៅនៅសាលប្រជុំសាលាខេត្តព្រះវិហារ ដែលមានការអញ្ជើញចូលរួមពីសំណាក់គណៈបញ្ជាការឯកភាពស្រុក-ក្រុងទាំង៨ កងកម្លាំងទាំងបី ថ្នាក់ដឹកនាំមន្ទីរ-អង្គភាពជុំវិញខេត្ត មេឃុំចៅសង្កាត់ មេប៉ុស្តិគ្រប់ឃុំ សង្កាត់ទាំងអស់៕ មុនីរម្យ
ប្រភព៖ រដ្ឋបាលខេត្តព្រះវិហារ