នៅថ្ងៃព្រហស្បតិ៍ ៦ កើត ខែពិសាខ ឆ្នាំកុរ ឯកស័ក ពុទ្ធសករាជ ២៥៦២ ត្រូវនឹងថ្ងៃទី៩ ខែឧសភា ឆ្នាំ២០១៩លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំពិភាក្សា អំពីការស្នើសុំកាត់ឆ្វៀលដី របស់ប្រជាពលរដ្ឋចេញពីដែនជម្រកសត្វព្រៃតាតៃ។

      លោកជំទាវអភិបាលខេត្ត សូមអោយរដ្ឋបាលក្រុង និងរដ្ឋបាលស្រុកមណ្ឌលសីមា ស្រុកកោះកុង ស្រុកថ្មបាំង ស្រុកបូទុមសាគរ ព្រមទាំងមន្ទីរ អង្គភាពជំនាញពាក់ព័ន្ធ ពិនិត្យលទ្ធភាព ក្នុងការស្នើសុំកាត់ឆ្វៀលដីចេញពីអនុក្រឹត ពីដែនជម្រកសត្វព្រៃតាតៃ ជូនប្រជាពលរដ្ឋ សម្រាប់ប្រើប្រាស់អោយបានស្របច្បាប់។ ព្រមទាំងផ្តោតការយកចិត្តទុកដាក់លើការពិនិត្យផែនទីលម្អិត ដើម្បីឱ្យបានដឹងថា ទំហំដីដែលនឹងស្នើសុំកាត់ឆ្វៀលជូនប្រជាពលរដ្ឋ និងពិនិត្យឡើងវិញនូវទីតាំងដីដែលនឹងរក្សាទុកជាតំបន់ការពារ ក៏ដូចជាទីតាំងដែលនឹងដាក់ជូនគណៈកម្មការថ្នាក់ជាតិពិនិត្យសម្រេច ដើម្បីមានសុគតិភាពទិន្នន័យ ក្រុមការងារនឹងរៀបចំនូវបញ្ជីឈ្មោះគ្រួសារ ដែលកាន់កាប់ដីជាក់ស្តែង និងធ្វើសំណើតាមរយៈរដ្ឋបាលឃុំ សង្កាត់ ក្រុង ស្រុក នឹងដាក់ជូនកិច្ចប្រជុំគណៈកម្មការខេត្តពិនិត្យ៕ មុនីរម្យ 
 
ប្រភព៖  រដ្ឋបាលខេត្តកោះកុង