នៅថ្ងៃច័ន្ទ ១០រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃ ទី២៩ ខែមេសា ឆ្នាំ ២០១៩ ឯកឧត្ដម ជាវ តាយ អភិបាល នៃគណៈអភិបាលខេត្តកំពត អមដំណើរដោយអាជ្ញាធរមូលដ្ឋានក្រុង សង្កាត់ បានអញ្ជើញចុះពិនិត្យគម្រោង ការស្ដារព្រែកចាកដែលជាព្រែកធម្មជាតិ ហើយក៏ជាប្រព័ន្ធរំដោះទឹកមួយចំណែកយ៉ាងសំខាន់នៃក្រុងកំពតខេត្តកំពត។
ឯកឧត្ដម ជាវ តាយ បានណែនាំជម្រុញអោយអាជ្ញធរមូលដ្ឋានក្រុងសង្កាត់ត្រូវតែយកចិត្តទុកដាក់ជាចាំបាច់ក្នុងការតាមដានត្រួតពិនិត្យប្រព័ន្ធលូទឹកនិងបញ្ហាទុកដាក់ប្រមូលសម្រាមដោយពង្រីកសេវាកម្មក្រុមហ៊ុនប្រមូលសម្រាមជាពិសេសផ្សព្វផ្សាយអោយប្រជាពលរដ្ឋយល់ដឹង និងចូលរួមទើបការអភិវឌ្ឍទទួលបានលទ្ធផលជោគជ័យ។ ឯកឧត្តមបន្តថាបញ្ហាប្រព័ន្ធលូទឹករាំងស្ទះគឺក៏ជា បញ្ហាចាំបាច់ត្រូវការគិតគូរ និងជាប្រចាំរបស់រដ្ឋបាលខេត្តនិងក្រុង សង្កាត់ ព្រោះវាក៏ជាបញ្ហាផ្ដល់នូវភាពលំបាកដល់ប្រជាពលរដ្ឋរួម និងការខូចខាតនូវហេដ្ឋារចនាសម្ព័ន្ធក្នុងក្រុងផងដែរ។
សូមបញ្ជាក់៖ ព្រែកចាកធម្មជាតិដែលមានគម្រោងស្ដារនេះគឺស្ថិតរវាងអន្តរ សង្កាត់ក្រាំងអំពិលនិងសង្កាត់កំពង់កណ្ដាលក្រុងកំពត គម្រោងត្រូវស្ដារនេះមានប្រវែង១៨០០ម៉ែត្រត្រូវចំណាយថវិកាប្រមាណ១៤ម៉ឺនដុល្លារ ក្រោមការឧបត្តម្ថដោយ ឯកឧត្ដម ជាវ តាយ អភិបាល នៃគណៈអភិបាលខេត្ត៕ គឹមអាន
ប្រភព៖ រដ្ឋបាលអភិបាលខេត្តកំពត
