នៅព្រឹកថ្ងៃអាទិត្យ ៩រោច ខែចេត្រ ឆ្នាំ កុរ ឯកស័ក ព.ស ២៥៦២ ត្រូវនឹងថ្ងៃទី២៨ ខែមេសា ឆ្នាំ២០១៩ ឯកឧត្តម ជាវ តាយ អភិបាលនៃគណ:អភិបាលខេត្តកំពត បានដឹកនាំមន្ទីរ-អង្គភាពជំនាញជុំវិញខេត្ត អភិបាលក្រុង ចៅសង្កាត់ ចុះពិនិត្យទីតាំង អាងចម្រោះទឹកព្រែកចាក ស្ថិតនៅភូមិក្រាំង សង្កាត់ក្រាំងអំពិល ក្រុងកំពត។
      ក្នុងនោះ ឯកឧត្តមអភិបាលខេត្ត បានណែនាំឲ្យចៅសង្កាត់ កាយបើកមុខទឹកទៅប្រឡាយមេជាបន្ទាន់ ដើម្បីរំដោះទឹកចេញពីក្រុងបណ្តោះអាសន្នសិន។ ព្រមទាំងបានឧបត្ថម្ភថវិកា១៤ម៉ឺនដុល្លារ ដើម្បីស្តារប្រឡាយមេទាំងមូល ទៅព្រែកចាក ប្រវែង១.៨គីឡូម៉ែត្រ ដោយជូន លោក ប៉ឹល កុសល អភិបាលរងខេត្តដឹកនាំ និងមានអភិបាលក្រុង មន្ទីរធនធានទឹកនិងឧតុនិយមខេត្ត និងមន្ទីរសាធារណការ និងដឹកជញ្ជូនខេត្ត ជាអ្នកចាត់ចែងការងារនេះ។ 

       សូមជម្រាបថា នៅយប់ថ្ងៃទី២៧ ខែមេសា ឆ្នាំ២០១៩ មានភ្លៀងមួយមេធំនៅក្រុងកំពត ដែលធ្វើឲ្យទឹកលិចនៅតំបន់មួយចំនួន ក្នុងក្រុងកំពត៕ មុនីរម្យ

ប្រភព៖ រដ្ឋបាលខេត្តកំពត