នាព្រឹកថ្ងៃព្រហស្បតិ៍ ៦រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២៥ ខែមេសា ឆ្នាំ ២០១៩ ឯកឧត្តម ជាវ តាយ អភិបាលនៃគណអភិបាលខេត្តកំពត បានអញ្ជើញជាអធិបតីក្នុងអង្គសិក្ខាសាលាផ្សព្វផ្សាយស្តីពីបទបញ្ញតិពាក់ព័ន្ធការប្រមូលពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ។ ដោយមានការអញ្ចើញចូលរួមពី៖ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកពន្ធដារ ក្រុមប្រឹក្សាខេត្ត អភិបាលរងខេត្ត កងកំលាំងទាំង៣ប្រភេទ លោក លោកស្រី ប្រធានមន្ទីរជុំវិញខេត្ត លោក លោកស្រី អភិបាលក្រុង ស្រុក លោកគ្រូ អ្នកគ្រូ មន្រ្តីពន្ធដា មេឃុំ ចៅសង្កាត់ ស្មៀន និងប្រាជាពលរដ្ឋក្នុងក្រុងកំពតសរុបចំនួន ៦២៧នាក់។
ក្នុងឱកាសនោះ ឯកឧត្តមអភិបាលខេត្ត បានមានប្រសាសន៍ថាៈ ចំណូលពន្ធដាជាប្រភពចំណូលយ៉ាងសំខាន់របស់រាជរដ្ឋាភិបាលដើម្បីបំពេញនូវតម្រូវការចំណាយរបស់រដ្ឋ"សម្រាប់កិច្ចការពារជាតិ សន្តិសុខ សណ្តាប់ធ្នាប់សង្គម កិច្ចការសង្គមកិច្ច ការអភិវឌ្ឍន៍ជាតិលើគ្រប់វិស័យ ការបើកផ្តល់ប្រាក់បៀវត្សជូនកងកម្លាំងប្រដាប់អាវុធ មន្រ្តីរាជការ គ្រូបង្រៀន"។ល។ ឯកឧត្តម បានអំពាវនាវ ដល់បងប្អូនប្រជាពលរដ្ឋ អ្នកជាប់ពន្ធទាំងអស់ ចូលរួមគោរពប្រតិបត្តិច្បាប់ បទបញ្ញត្តិ និងនីតិវិធីពាក់ព័ន្ធនានាអោយបានត្រឹមត្រូវ គ្រប់គ្រាន់អោយបានទាន់ពេលវេលា៕ មុនីរម្យ
ប្រភព៖ រដ្ឋបាលខេត្តកំពត