រសៀលថ្ងៃចន្ទ ៤កើត ខែចេត្រ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែមេសា ឆ្នាំ២០១៩  ឯកឧត្តម ជាវ តាយ អភិបាលនៃគណៈអភិបាលខេត្តកំពត បានទទួលអំណោយពីក្រុមហ៊ុនកំពតឋានសួគ៌ ដើម្បីសម្រួលការងារអនាម័យបរិស្ថាន និងការងាររៀបចំកំពតសង្ក្រាន្ត ក្នុងនោះរួម៖ ម៉ូតូចំនួន១០គ្រឿង (ជូនរដ្ឋបាលខេត្ត៥គ្រឿង និងជូនស្នងការនគរបាលខេត្ត៥គ្រឿង) ធុងសំរាមចំនួន២០០ធុង និងថវិកា៣ម៉ឺនដុល្លា ។ ដោយមានការចូលរួមពី អភិបាលរងខេត្ត នាយករដ្ឋបាលសាលាខេត្ត នាយកទីចាត់ការ ចំណុះសាលាខេត្ត នាយកក្រុមហ៊ុន និងក្រុមការងារ សរុបប្រមាណ៣០នាក់។

      ថ្លែងក្នុងពិធីនេះ ឯកឧត្តមអភិបាលខេត្ត បានមានប្រសាសន៍ថា ការចូលរួមឧបត្ថម្ភ របស់ក្រុមហ៊ុន កំពតឋានសួគ៌ គឺជាការចូលរួមដ៏ធំធេងក្នុងការថែរក្សាអនាម័យសាធារណៈ ក៏ដូចជាចូលរួមអភិវឌ្ឍន៍មុខមាត់ខេត្តកំពតឲ្យកាន់តែមានសភាពស្រស់ស្អាត និងបរិស្ថាន អនាម័យល្អ ជាពិសេសជួយឲ្យការរៀបចំកំពតសង្ក្រាន្តកាន់តែមានភាពអធិកអាធមទៀតផង។ 

      ជាចុងក្រោយ ឯកឧត្តមអភិបាលខេត្ត បានជូនពរដល់ក្រុមហ៊ុន កំពតឋានសួគ៌ សូមទទួលបានជោគជ័យក្នុងដំណើរប្រតិបត្តិការអាជីវកម្មរបស់ខ្លួន ប្រកបដោយប្រសិទ្ធភាព និងនិរន្តរភាពជារៀងរហូត៕ មុនីរម្យ

ប្រភព៖ រដ្ឋបាលខេត្តកំពត