នាព្រឹកថ្ងៃចន្ទ ៤កើត ខែចេត្រ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែមេសា ឆ្នាំ២០១៩ ឯកឧត្តម យឹម សុខុម ប្រធានក្រុមប្រឹក្សាខេត្ត លោក សរ សុពុត្រា អភិបាលរង ព្រមទាំងថ្នាក់ដឹកនាំមន្ទីរ អង្គភាពជុំវិញខេត្ត រដ្ឋបាលក្រុងស្រុកទាំង៨ និង ស.ស.យ.ក ខេត្តកំពង់ស្ពឺ បានចូលរួម ក្នុងពិធីក្រុងពាលីបួងសួងសុំសេចក្តីសុខក្នុងការរៀបចំទីតាំង និងប្រារព្ធកំពង់ស្ពឺសង្ក្រាន្ត នៅវេទិកាអុំទូកខេត្ត ក្រុងច្បារមន នាឱកាសចូលឆ្នាំប្រពៃណីខ្មែរខាងមុខ។
គួរបញ្ជាក់ផងដែរ សង្ក្រាន្តកំពង់ស្ពឺ នឹងប្រារព្ធធ្វើឡើងនៅថ្ងៃទី១៤-១៦ខែមេសា ឆ្នាំ២០១៩ នៅបរិវេណ សួនច្បារសម្ដេចព្រះសង្ឃរាជជួនណាត ដើម្បីផ្តល់ឱកាសឲ្យយុវជន និងសាធារណជនទូទៅបានចូលរួម អបអរពិធីបុណ្យចូលឆ្នាំខ្មែរក្នុងនាមជាមហាគ្រួសារខ្មែរតែមួយ ក៏ដូចជាឲ្យយុវជនខ្មែរជំនាន់ ក្រោយបាន ស្វែងយល់នូវភាពរុងរឿងនៃព្រះរាជាណាចក្រកម្ពុជា តាំងពីសម័យមហានគរ រហូតដល់បច្ចុប្បន្ន និងបន្តទៅ អនាគត។ ក្រៅពីនេះ ព្រឹត្តិការណ៍កំពង់ស្ពឺសង្ក្រាន្តនឹងជួយលើកតម្កើងកិត្តិយសជាតិ វប្បធម៌ជាតិ និងផ្សព្វផ្សាយឲ្យសកលលោកផងដឹងផងដែរ ជាពិសេសគឺអាចស្រូបទាញទេសចរជាតិ-អន្តរជាតិឲ្យមកកម្សាន្តខេត្តកំពង់ស្ពឺកាន់តែច្រើនបន្ថែមទៀត៕ គឹមអាន
ប្រភព៖ រដ្ឋបាលខេត្តកំពង់ស្ពឺ