នាព្រឹកថ្ងៃសៅរ៍ ២កើត ខែចែត្ រឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៦ ខែមេសា ឆ្នាំ២០១៩ ឯកឧត្តមអ៊ុន ចាន់ដា អភិបាលនៃគណៈអភិបាលខេត្ តនិងឯកឧត្តម ឡុង សុវណ្ណ ប្រធានក្រុមប្រឹក្សាខេត្ត អញ្ជើញចុះសាកសួរសុខទុក្ខ កងកម្លាំងប្រដាប់អាវុធឈរជើងការពារបូរណភាពទឹកដីនៅតាមបណ្តោយព្រំដែនកម្ពុជា ថៃនិងឡាវ នាឱកាសបុណ្យចូលឆ្នាំថ្មីប្រពៃណីខ្មែរខាងមុខ នៅទីបញ្ជាការកងពលធំលេខ០៣  និងទីបញ្ជាការវរសេនាតូចលេខ១ក្នុងខេត្តព្រះវិហារ។

      មានប្រសាសន៍ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្ត ថ្លែងអំណរគុណដល់នាយ នគរបាល -ទាហាន ពលនគរបាល- ទាហាន និងកម្លាំងទាំងអស់ដែលឈរជើងការពារអធិបតេយ្យ បូរណភាពទឹកដីនៅតាមបណ្តោយព្រំដែនថៃ និងឡាវ រក្សាការពារបាននូវសន្តិសុខ ភាពស្ងប់ស្ងាត់ជូនដល់ប្រជាពលរដ្ឋយើង។ បន្ថែមពីនេះទៀត កងកម្លាំងយើងតែងតែបង្កើននូវកិច្ចសហប្រតិបត្តិការល្អតាមបណ្តោយព្រំដែនជាមួយកងកម្លាំង និងប្រជាជនថៃ និងឡាវ ប្រែក្លាយព្រំដែន ជាព្រំដែន សន្តិភាព កិច្ចប្រតិបត្តិការល្អជាបន្តបន្ទាប់មក។ ឯកឧត្តមអភិបាលខេត្ត បានបន្តទៀតថា ក្រោមការដឹកនាំដ៏ឈ្លៀសវៃនិងប៉ិនប្រសពរបស់សម្តេច តេជោ ហ៊ុន សែន កងកម្លាំងប្រដាប់អាវុធយើងទទួលបាននូវការលើកទឹកចិត្តជាប្រចាំតាមរយៈ ការតម្លើងឋានន្តរស័ក ការតម្លើងប្រាក់បៀវត្សប្រចាំ ឆ្នាំជាដើម លើសពីនេះទៀតរាជរដ្ឋាភិបាល តែងតែគិតគូរដល់មន្រ្តីនគរបាល យោធាដែលចូលនិវត្តន៍ដោយបានបញ្ចូលក្នុងសមាគមអតីតយុទ្ធជន ថែមទៀតផង ។

       ជាចុងក្រោយ ឯកឧត្តមអភិបាលខេត្ត ប្រកាសនឹងផ្តល់នូវថវិកា១លានរៀលដល់កម្លាំងណា ឬប្រជាពលរដ្ឋណាដែលរកឃើញ និងចាប់បាននូវអ្នកជួញដូរគ្រឿងញៀនខុសច្បាប់។ព្រមទាំងអំពាវនាវដល់កងកម្លាំង ចូលរួមទាំងអស់គ្នា ទប់ស្កាត់ការប្រើប្រាស់ ជួញដូរគ្រឿង ញៀនឆ្លងដែន និងតាមបណ្តោយព្រំដែនឲ្យបានខ្លាំងក្លា និងរួមគ្នាគោរពច្បាប់ចរាចរណ៍ ជៀសវាង បើកបរដោយសេពគ្រឿងស្រវឹង ដែលហេតុបង្កឲ្យមានគ្រោះថ្នាក់ចរាចរនេះឡើង។

       ក្នុងនោះដែរ ឯកឧត្តមអភិបាលបាននាំយកនូវគ្រឿងឧបភោគ បរិភោគជូនដល់ នរគបាលការពារព្រំដែន នាយទាហាន ពលទាហាន ចំនួន០៥អង្គភាពរួមមានកងពលធំលេខ៣ ទីបញ្ជាការវរសេនាតូចលេខ១ ទីបញ្ជាការ អង្គរក្ស ក្នុងមួយអង្គភាព ៥លានរៀល និងផ្តល់ថវិកាលើកទឹកចិត្ត ដល់ពលទាហានម្នាក់៥ម៉ឺនរៀលផងដែរ ៕មុនីរម្យ

ប្រភព៖ រដ្ឋបាលខេត្តព្រះវិហារ