ឯកឧត្តម អ៊ូច ភា អភិបាលខេត្តតាកែវ បានធ្វើការជម្រុញទៅដល់ថ្នាក់ដឹកនាំ និងមន្រ្តីសុខាភិបាលទាំងអស់ត្រូវត្រួតពិនិត្យឡើងវិញ និងធ្វើយ៉ាងណាត្រូវតែលុបបំបាត់ឲ្យអស់ ចំពោះសកម្មភាពលក់ថ្នាំពេទ្យ តាមទីផ្សារ តាមផ្ទះដោយពុំមានច្បាប់អនុញ្ញាតត្រឹមត្រូវ។
ឯកឧត្តមថ្លែងដូច្នេះនៅចំពោះមុខមន្រ្តីសុខាភិបាលប្រមាណជាង៣០០នាក់ ដែលបានចូលរួមក្នុងកម្មវិធីបិទសន្និបាតបូកសរុបលទ្ធផលការងារសុខាភិបាលប្រចាំឆ្នាំ២០១៨ និងលើកទិសដៅបន្តឆ្នាំ២០១៩ នៅរសៀលថ្ងៃព្រហស្បតិ៍ ទី០៤ ខែមេសា ឆ្នាំ២០១៩ នៅសាលប្រជុំមន្ទីរសុខាភិបាលខេត្ត។ ឯកឧត្តមបន្តថា ការលក់ថ្នាំពេទ្យនៅតាមទីផ្សារ តាមផ្ទះរបស់បងប្អូនប្រជាពលរដ្ឋមួយចំនួន ដោយពុំមានការត្រួតពិនិត្យឲ្យបានច្បាស់លាស់ពីសំណាក់មន្រ្តីសុខាភិបាលនេះ វាពិតជាប៉ះពាល់យ៉ាងខ្លាំងទៅដល់សុខភាពរបស់បងប្អូនប្រជាពលរដ្ឋ ព្រោះថ្នាំពេទ្យទាំងនេះមិនដឹងថា ជាថ្នាំល្អ មានគុណភាព មានកាលបរិច្ឆេទប្រើប្រាស់ត្រឹមត្រូវ ឬមានការបញ្ជាក់ត្រឹមត្រូវពីជំនាញឬយ៉ាងណានោះទេ។ ឯកឧត្តម អ៊ូច ភា បញ្ជាក់ថាប្រសិនបើការលក់ថ្នាំពេទ្យដែលពុំមានការត្រួតពិនិត្យច្បាស់លាស់ត្រូវបានលុបបំបាត់ឲ្យអស់នោះ វានឹងចូលរួមចំណែកលើកកម្ពស់សុខមាលភាពរបស់ប្រជាពលរដ្ឋយើងឲ្យមានសុខភាពល្អរឹងមាំ មានអាយុវែងគ្រប់ៗគ្នាជាពិសេសវា និងជួយកាត់បន្ថយភាពក្រីក្ររបស់បងប្អូនប្រជាពលរដ្ឋផងដែរ៕ គឹមអាន
ប្រភព៖ រដ្ឋបាលខេត្តតាកែវ