រដ្ឋបាលខេត្តព្រះវិហារ បានរៀបចំកិច្ចប្រជុំត្រួតពិនិត្យការងាររៀបចំព្រឹត្តិការណ៍ព្រះវិហារ សង្ក្រាន្តកោះកេរឆ្នាំ២០១៩ ក្រោមអធិបតីភាព ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តព្រះវិហារព្រមទាំង អភិបាលរង ខេត្ត លោកលោកស្រីប្រធានអនុប្រធានមន្ទីរអង្គភាពជុំវិញខេត្ត ថ្នាក់ដឹកនាំកងកម្លំាងទាំងបីខេត្ត អភិបាលអភិបាលរងក្រុង-ស្រុក និងបណ្តាអង្គភាពពាក់ព័ន្ធ ដែលបានធ្វើឡើងនាថ្ងៃព្រហស្បតិ៍ ១៥រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៤ ខែមេសា ឆ្នាំ២០១៩។
មានប្រសាសន៍ក្នុងឱកាសនោះ ឯកឧត្តមអភិបាលខេត្ត ថា សង្ក្រាន្តកោះកេរ ត្រូវបានរៀបចំឡើងដោយរដ្ឋបាលខេត្តព្រះវិហារ សហការជាមួយអាជ្ញាធរជាតិព្រះវិហារ និងសហភាពសហព័ន្ធយុវជនកម្ពុជាខេត្តព្រះវិហារ ។ហើយ សង្រា្កន្តកោះកេរឆ្នាំ២០១៩នេះ ក្រៅពីការលេងល្បែងប្រជាប្រិយខ្មែរ ការសម្តែងរបាំប្រពៃណី ក៏នឹងមានការរៀបចំស្តង់ពិព័រណ៍លើឧបករណ៍សម្ភារៈ ផលិតផលកើតចេញពីស្នាដៃកូនខ្មែរ ក៏ដូចម្ហូបអាហារជារបស់ខ្មែរនៅតាមបណ្តាក្រុង ស្រុក សរុបទាំងអស់៥២ស្តង់ ។ លើសពីនោះទៀត ឯកឧត្តមអភិបាលខេត្តបានណែនាំដល់កងកម្លាំងមានសមត្ថកិច្ច ជាពិសេស នគរបាលខេត្ត និងកងរាជអាវុធហត្ថខេត្ត ត្រូវពង្រឹងការពារឲ្យបានល្អនូវសន្តិសុខសណ្តាប់ធ្នាប់ជូនដល់ប្រជាពលរដ្ឋដែលទៅចូលរួមលេងកំសាន្តនាឱកាសនោះ៕ យ៉ាមី
ប្រភពៈ រដ្ឋបាលខេត្តព្រះវិហារ