នៅព្រឹកថ្ងៃព្រហស្បតិ៍ ១៥កើត ខែផល្គុន ឆ្នាំចសំរឹទ្ធិស័ក ព.ស ២៥៦២ ត្រូវនឹងថ្ងៃទី០៤ ខែមេសា ឆ្នាំ២០១៩ នៅសាលប្រជុំសាលាខេត្តមានការរៀបចំកម្មវិធីបើកវគ្គបណ្តុះបណ្តាលស្ដីពីការអនុវត្តអនុសញ្ញា "ការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ" (ស៊ី.ដ / CEDAW) អនុសាសន៍គន្លឹះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្រោមអធិបតីភាព លោកជំទាវ ម៉ុម ថានី រដ្ឋលេខាធិការក្រសួង បរិស្ថាន នឹងជាសមាជិកានៃក្រុមប្រឹក្សាជាតិកម្ពុជាដើម្បីស្ដ្រី ព្រមទាំងឯកឧត្ដម អ៊ុន ចាន់ដា អភិបាលនៃគណៈអភិបាលខេត្តព្រះវិហារ នឹងមានការអញ្ចើញចូលរួមពីសំណាក់ ឯកឧត្ដម លោកជំទាវ ប្រតិភូអមដំណើរ លោកលោកស្រីតំណាងឱ្យមន្ទីរអង្គភាពជុំវិញខេត្ត សិក្ខាកាមមកពីបណ្តាខេត្ត រួម មានខេត្តសៀមរាប ខេត្តឧត្តរមានជ័យផងដែរ។

      មានប្រសាសន៍ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្ត មានប្រសាសន៍ថា រដ្ឋបាលខេត្ត នឹងបន្តខិតជំរុញការអនុវត្តផែនការបញ្រ្ជាបយេនឌ័រក្នុងថ្នាក់ខេត្តឲ្យកាន់តែមានប្រសិទ្ធភាព ដោយបន្តយន្តការតាមដាន និងវាយតម្លៃលទ្ធផល បន្តយកចិត្តទុកដាក់ក្នុងការបង្កើនចំនួនស្រ្តីបន្ថែមទៀតនៅថ្នាក់មន្ទីរ អង្គភាព ជាពិសេសថ្នាក់ដឹកនាំ ក្រុង ស្រុក ព្រមទាំងជួយឧបត្ថម្ភគាំទ្រទាំស្មារតីមធ្យោបាយ ថវិកា ។លើសពីនេះទៀតនឹងជំរុញបង្កើនសមត្ថភាពមន្រ្តីរាជការជាស្រ្តីឲ្យមានឱកាសចូលរួមដឹកនាំតាមបណ្តាអង្គភាពនានា ៕ មុនីរម្យ

ប្រភព៖ រដ្ឋបាលខេត្តព្រះវិហារ