ឯកឧត្ដម អ៊ុន ចាន់ដា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តព្រះវិហារ បានដឹកនាំកិច្ចប្រជុំ គណៈបញ្ជាការឯកភាពរដ្ឋបាលខេត្ត ដោយមានការចូលរួមពីអភិបាលរងខេត្ត មេបញ្ជាការកងកម្លាំងទាំង៣ខេត្ត មេបញ្ជាការតាមបណ្តោយ ព្រំដែន ប្រធានមន្ទីរអង្គភាពជុំវិញខេត្ត អភិបាល ក្រុង ស្រុក មេឃុំ សង្កាត់ ពាក់ព័ន្ធ ជាច្រើនរូប នាថ្ងៃពុធ ១៤រោច ខែ ផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៣ ខែមេសា ឆ្នាំ២០១៩ នៅសាលប្រជុំសាលាស្រុកកែប ខេត្តព្រះវិហារ ។
មានប្រសាសន៍ក្នុងឱកាសនោះ ឯកឧត្តមអភិបាលខេត្ត បានណែនាំដល់អាជ្ញាធរមានសមត្ថកិច្ច ត្រូវអនុវត្តវិធានការដូចខាងក្រោម៖
១/-ខិតខំពង្រឹងប្រសិទ្ធភាពការពារស្ថិរភាពសន្តិសុខសណ្ដាប់ធ្នាប់សាធារណៈនិងរៀបចំ ផែនការពង្រាយកម្លាំងការពារសន្តិសុខសណ្តាប់ធ្នាប់ក្នុងឱកាសចូលឆ្នាំថ្មី ។
២/- អភិបាលក្រុង ស្រុក ត្រូវសហការជាមួយមន្រ្តីជំនាញ នគរបាលយុត្តិធម៌ ចុះការបង្ក្រាប និងទប់ស្កាត់បទល្មើសធនធានធម្មជាតិ ការកាប់ទន្រ្ទានព្រៃ ដីតំបន់អភិរក្ស ពីជនខិលខូច និងត្រូវអនុវត្តច្បាប់ឲ្យបានខ្លាំងក្លា។
៣/-អភិបាលក្រុង ស្រុក មេឃុំចៅសង្កាត់ ត្រូវពង្រឹងក្រុមប្រជាការពាររបស់ខ្លួនជាប្រចាំ ហើយគ្រប់ឃុំសង្កាត់ត្រូវមានប្រជាការពារ របស់ខ្លួន ៕ មុនីរម្យ
ប្រភព៖ រដ្ឋបាលខេត្តព្រះវិហារ