នាព្រឹកថ្ងៃពុធ ១៤រោច ខែផល្គុន ឆ្នាំច សំរិទ្ធិស័ក ព.ស ២៥៦២ ត្រូវនឹងថ្ងៃទី០៣ ខែមេសា ឆ្នាំ២០១៩ ឯកឧត្តម ជាវ តាយ អភិបាលនៃគណ:អភិបាលខេត្តកំពត ទទួលជួបប្រតិភូខេត្តគៀងយ៉ាង ដឹកនាំដោយលោកជំទាវ ដាំង ង្វៀង អែម អនុលេខាធិការបក្សខេត្តគៀងយ៉ាង អញ្ជើញមកជូនពរបុណ្បចូលឆ្នាំថ្មី ប្រពៃណីជាតិខ្មែរ នៅសាលាខេត្តកំពត។ វត្តមានអញ្ជើញចូលរួមមាន៖ ឯកឧត្តម លោកជំទាវ អភិបាលរងខេត្ត លោកនាយក នាយករងរដ្ឋបាលសាលាខេត្ត លោកប្រធានសាលាដំបូងខេត្ត កងកំលាំងទាំង៣ប្រភេទ នាយកទីចាត់ការ អង្គភាពចំណុះសាលាខេត្ត និងមន្ទីរអង្គភាពពាក់ព័ន្ធសរុបចំនួន ៦០នាក់។
មានប្រសាសន៍សំណេះសំណាល ឯកឧត្តម ជាវ តាយ ចាត់ទុកការអញ្ជើញមកជូនពរនាពេលនេះពិតជាមានសារៈសំខាន់ ក្នុងន័យដើម្បីរិតចំណងសាមគ្គីភាព រវាងខេត្តកំពត និងខេត្តគៀងយ៉ាង ។ ក្នុងនាមជាបងប្អូន និងជាអ្នកជិតខាងល្អខេត្តគៀងយ៉ាង តែងតែជួយឧបត្ថមគាំទ្រ ទាំងស្មារតី សំភារៈ និងថវិកាដល់ខេត្តកំពត។ ទន្ទឹមនេះដែរ កិច្ចសហប្រតិបត្តិការការពារសន្តិសុខតាមបន្ទាត់ព្រំដែនរវាងខេត្តទាំងពីរជាសាច់ញាតិ បងប្អូន បានសួរសុខទុក្ខគ្នា និងប្រកបរបររកស៊ី មានភាពសុខសាន្ត និងរីកចម្រើនជាលំដាប់៕ មុនីរម្យ
ប្រភព៖ រដ្ឋបាលខេត្តកំពត