នាព្រឹកថ្ងៃចន្ទ ១២រោច ខែផល្គុន ឆ្នាំច សំរឹទ្ធិស័ក ព.ស ២០៥៦២ ត្រូវនឹងថ្ងៃទី០១ខែមេសា គ.ស ២០១៩ ក្រោមវត្តមានរបស់ ឯកឧត្តម ទៀ សីហា អភិបាលនៃគណៈអភិបាលខេត្ត ឯកឧត្តម អ៊ឹង ហឿន ប្រធានក្រុមប្រឹក្សាខេត្ត ព្រមជាមួយក្រុមការងារនៃព្រឹត្តិការណ៍សៀមរាបសង្ក្រាន្ត របស់សហភាពសហព័ន្ធយុវជនកម្ពុជាខេត្តនិង អាជ្ញាធរជាតិអប្សរា បានប្រារព្ធពិធីក្រុងពាលី តាមបែបព្រហ្មញ្ញសាសនា នៅជាប់បរិវេណព្រះអង្គចេក ព្រះអង្គចម ( ខេត្តសៀមរាប )។ ពិធីក្រុងពាលីនេះ បានធ្វើឡើងតាមបែបព្រហ្មញ្ញសាសនាសុទ្ធសាធ ដែលនៅក្នុងនោះរួមមាន ពីធីថ្វាយនូវគ្រឿងសក្ការៈទិសទាំង១០ ពិធីថ្វាយគ្រឿងសក្ការៈទិសធំ ប្រកាសឧទ្ទីសបួងសួង និង ប្រគុំថ្វាយភ្លេងពិណពាធចំពោះបារមីវត្ថុស័ក្តសិទ្ធ ហើយដែលមួយផ្នែកនៃពិធីនេះ គឺបូជាព្រះភូមិ និងបូជាថ្វាយស្តេចក្រុងពាលី ដើមី្បសុំនូវសេចក្តីសុខ ក្នុងការរៀបចំធ្វើសៀមរាបសង្រ្កាន្តឆ្នាំថ្មី នៅលើទឹកដីប្រវត្តិសៀមរាប ឲ្យបានប្រព្រឹត្តទៅប្រកបដោយភាពសុខសាន្ត ជូនដល់ប្រជាពលរដ្ឋ ភ្ញៀវទេសចរណ៍ជាតិ អន្តរជាតិ បានសប្បាយរីករាយទៀតផង ។
សូមបញ្ជាក់ផងដែរថា ព្រឹត្តិការណ៍អង្គរសង្ក្រាន្ត ដែលរបៀបចំដោយសហភាពសហព័ន្ធយុវជនកម្ពុជាក្នុងលក្ខណៈជាថ្នាក់ជាតិ ហើយក្នុងគោលបំណង ផ្តល់ឱកាសឲ្យយុវជន សាធារណជន ខ្មែរទូទៅ បានចូលរួមអបអរសាទរ ពិធីបុណ្យចូលឆ្នាំថ្មី ប្រពៃណីជាតិនៅខេត្តសៀមរាប ជាលក្ខណៈមហាគ្រួសារខ្មែរតែមួយ ជ្រកក្រោមដំបូលសន្តិភាពតែមួយ ក្រោមស្មារតីសុខដុម សប្បាយរីករាយ និងបានសិក្សាស្វែងយល់នូវភាពរុងរឿង នាសម័យមហានគរ និង ការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការបំផុសឆន្ទះ បន្តថែរក្សាមរតកវប្បធម៌ជាតិខ្មែរ ឲ្យបានគង់វង្សតទៅអនាគត៕ គឹមអាន
ប្រភព៖ រដ្ឋបាលខេត្តសៀមរាប