លោក ឈិន សេងងួន អភិបាលស្តីទីខេត្តព្រះសីហនុ អញ្ជើញបើកកិច្ចប្រជុំប្រចាំខែមីនា និងលើកទិសដៅអនុវត្តបន្ត ដោយមានការចូលរួមពីមន្ទីរ អង្គភាពជំនាញពាក់ពន្ធក្នុងខេត្ត នារសៀលថ្ងៃ ៨រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨ ខែមីនា ឆ្នាំ២០១៩ ។
លោក ឈិន សេងងួន អភិបាលស្តីទីខេត្តព្រះសីហនុ បានមានប្រសាសន៍ កោតសរសើរដល់មន្ទីរ អង្គភាពគ្រប់លំដាប់ថ្នាក់ ដែលបានខិតខំបំពេញការងារ អនុវត្តតាមផែនការ និងសកម្មភាពនានា ធ្វើឱ្យខេត្តមានការអភិវឌ្ឍ ថ្វីត្បិតតែមានបញ្ហាប្រឈមមួយចំនួនកើតឡើងយើងបានចូលរួមដោះស្រាយបានទាន់ពេលវេលា។ លោកបានបន្តថា គ្រប់មន្ទីរ អង្គភាព ត្រូវយកចិត្តទុកដាក់បន្ថែមទៀត ដើម្បីចូលរួមដឹកនាំកាន់តែល្អប្រសើរ ដោយឆ្នាំ២០១៩នេះ រដ្ឋបាលខេត្តព្រះសីហនុ នឹងរៀបចំសង្ក្រាន្តសមុទ្រលើកទីមួយនៅឆ្នេរឯករាជ្យ ដើម្បីផ្សព្វផ្សាយពីសក្តានុពលទេសចរណ៍តំបន់ឆ្នេរ និងរៀបចំទទួលភ្ញៀវទេសចរមកចូលរួមលេងកម្សាន្ត ក្នុងឱកាសបុណ្យចូលឆ្នាំប្រពៃណីខ្មែរនាពេលខាងមុខនៅខេត្តព្រះសីហនុ។ ទន្ទឹមនោះយើងត្រូវតែបំផុសប្រជាពលរដ្ឋ សំអាតបរិស្ថានអនាម័យនៅតាមគេហដ្ឋាន ទីសាធារណៈ ឱ្យមានសោភ័ណភាព ក្រុងទេសចរណ៍រកាន់តែមានភាពទាក់ទាញ៕ គឺមអាន
ប្រភព៖ រដ្ឋបាលខេត្តព្រះសីហនុ