ឯកឧត្តម ម៉ុម សារឿន អភិបាលនៃគណ:អភិបាលខេត្តស្ទឹងត្រែង បានដឹកនាំមន្រ្តីរាជការ កម្លាំងប្រដាប់អាវុធ និងអាជ្ញាធរមូលដ្ឋាន ចុះជួយផ្គត់ផ្គង់ និងដឹកជញ្ជូនទឹក ដាក់ក្នុងអាងទឹកធ្វើពីកៅស៊ូតង់ ដាក់តាមភូមិខ្វះខាតទឹក ព្រមទាំងបានចែកមុង ចែកថ្នាំពេទ្យ ពិនិត្យ និងជំងឺព្យាបាលជូនប្រជាពលរដ្ឋចំនួន២០០ គ្រួសារ នៅភូមិគីរីបាស់លើ ឃុំសន្តិភាព ស្រុកសៀមប៉ាង។

      នៅក្នុងឱកាសចុះផ្គត់ផ្គង់ទឹកជូនបងប្អូនប្រជាពលរដ្ឋ នាព្រឹកថ្ងៃសុក្រ ៩រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៩ ខែមីនា ឆ្នាំ២០១៩ ឯកឧត្តម ម៉ុម សារឿន អភិបាលខេត្ត បានពាំនាំនូវការផ្តាំផ្ញើសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជានិច្ចកាលសម្តេចទាំងទ្វេរ តែងតែគិតគូរដល់សុខទុក្ខ និងជីវភាពរស់នៅរបស់ប្រជាពលរដ្ឋគ្រប់ពេលវេលា។

      ឯកឧត្តម ម៉ុម សារឿន អភិបាលខេត្ត បានជំរុញដល់អាជ្ញាធរ មូលដ្ឋាន ភូមិ ឃុំ ស្រុក និងអ្នកពាក់ព័ន្ធ ត្រូវយកចិត្តទុកដាក់ ពិនិត្យអោយបានគ្រប់ជ្រុងជ្រោយ ដើម្បីជីកអណ្តូង ធ្វើអាងស្តុបទឹក និងផ្គត់ផ្គង់ទឹកជូនបងប្អូនប្រជាពលរដ្ឋយើងប្រើប្រាស់អោយបានគ្រប់គ្រាន់ ជាពិសេស បងប្អូនណាមានមធ្យោបាយដឹកជញ្ជូន ត្រូវរួមសាមគ្គីគ្នា ជាមួយនិងក្រុមការងារអោយបានជិតស្និត ចំពោះការចំណាយថវិកា និងប្រេងឥន្ទន: ឯកឧត្តម អភិបាលខេត្ត ជាអ្នកផ្គត់ផ្គង់ជូនទាំងអស់ រហូតដល់មានភ្លៀងធ្លាក់ មានទឹកប្រើប្រាស់ឡើងវិញ។ ជាមួយគ្នានេះដែរឯកឧត្តម ម៉ុម សារឿន អភិបាលខេត្ត បានធ្វើការណែនាំដល់អាជ្ញាធរស្រុក ត្រូវចាត់តាំងកំលាំងប្រចាំការ នៅទីតាំងណាខ្វះទឹកប្រើប្រាស់ ចាំបាច់ត្រូវមានមន្រ្តីជំនាញពាក់ព័ន្ធ និងអាជ្ញាធរមូលដ្ឋានចូលរួមប្រចាំការផងដែរ៕ មុនីរម្យ

ប្រភព៖ រដ្ឋបាលខេត្តស្ទឹងត្រែង