នាព្រឹកថ្ងៃព្រហស្បតិ៍ ៨រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូនឹងថ្ងៃទី ២៨ ខែមីនា ឆ្នាំ២០១៩ ឯកឧត្តម ងួន រតន: អភិបាលនៃគណ:អភិបាលខេត្តបាត់ដំបង បានសហការជាមួយក្រសួងសាធារណការ និងដឹកជញ្ជូនបើកយុទ្ធនាការពាក់មួកសុវត្តិភាពដើម្បីពង្រឹងសុវត្តិភាពចរាចរណ៍ផ្លូវគោកនៅខេត្តបាត់ដំបងក្រោមអធិបតីភាព លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន នៅចំណុចទីលានមុខសាលាខេត្ត និងមានការអញ្ជើញចូលរួមពីថ្នាក់ដឹកនាំមន្រ្តីរាជការ កងកម្លាំង យុវជនកាកបាទក្រហម យុវជន ស.ស.យ.ក និងប្រជាពលរដ្ឋចូលរួមផងដែរ។
ឯកឧត្តម ងួន រតនៈ អភិបាលខេត្ត បានថ្លែងអំណរគុណ និងវាយតម្លៃខ្ពស់ចំពោះថ្នាក់ដឹកនាំ មន្រ្តីមន្ទីរជំនាញដែលបានខិតខំបំពេញភារកិច្ចរបស់ខ្លួន ហើយមានកិច្ចសហការជាមួយរដ្ឋបាលខេត្ត និងមន្ទីរពាក់ព័ន្ធបានល្អ។ ឯកឧត្តម ក៏បានធ្វើការផ្តាំផ្ញើដល់ប្អូនៗយុវជន និងប្រជាពលរដ្ឋក្នុងខេត្តទាំងអស់ថា យើងត្រូវនាំគ្នាគោរពច្បាប់ចរាចរណ៍ឲ្យបានជាប្រចាំ ដើម្បីបញ្ជៀស និងកាត់បន្ថយបញ្ហាគ្រោះថ្នាក់ចរាចរណ៍ គឺត្រូវពាក់មួកសុវត្តិភាពឲ្យបានគ្រប់គ្នាចំពោះអ្នកជិះម៉ូតូ និងបើកបររថយន្តត្រូវពាក់ខ្សែក្រវ៉ាត់ មិនត្រូវផឹកគ្រឿងស្រវឹងនៅពេលបើកបរឡើយ។
លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន បានលើកទឹកចិត្ត និងធ្វើការសរសើរខ្ពស់ដល់មន្រ្តីមន្ទីរជំនាញទាំងអស់តែងតែធ្វើការងារបានល្អកន្លងមក និងសហការល្អជាមួយមន្ទីរពាក់ព័ន្ធក៏ដូចជារដ្ឋបាលខេត្តផងដែរ។ លោកជំទាវ បានប្រាប់ទៅក្មួយៗទាំងអស់នាំគ្នាចូលរួមគោរពច្បាប់ចរាចរណ៍ឲ្យបានល្អ គោរពច្បាប់ចរាចរណ៍ស្មើនឹងគោរពការពារអាយុជីវិតខ្លួនឯង។ លោកជំទាវក៏បានបានបញ្ជាក់ថា ប្រទេសកម្ពុជាយើងពីមុនប្រជាពលរដ្ឋបានស្លាប់ដោយសារគ្រាប់មីន និងជម្ងឺផ្សេងៗ តែបច្ចុប្បន្នមនុស្សស្លាប់ដោយសារគ្រោះថ្នាក់ចរារណ៍បានឈាមុខគេ គឺស្លាប់ជារៀងរាល់ថ្ងៃ ហេតុនេះហើយទើបរាជរដ្ឋាភិបាលកម្ពុជាបានយកចិត្តទុកដាក់បំផុត ដោយឲ្យក្រសួងសាធារណ:ការ និងដឹកជញ្ជូនជាក្រសួងជំនាញធ្វើការផ្សព្វផ្សាយច្បាប់ចរាចរណ៍ដោយបើកទូលាយជាប្រចាំ និងតាមរយ:ប្រព័ន្ធផ្សព្វផ្សាយផ្សេងៗ ដើម្បីឲ្យប្រជាពលរដ្ឋទូទៅមានការប្រុងប្រយ័ត្ន ការពារអាយុជីវិតខ្លួនឯងក៏ដូចជាការពារអាយុជីវិតអ្នកដ៏ទៃផងដែរ៕ មុនីរម្យ
ប្រភព៖ រដ្ឋបាលខេត្តបាត់ដំបង