ព្រឹកថ្ងៃអង្គារ  ៦រោច  ខែផល្គុន  ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៦ ខែមីនា  ឆ្នាំ២០១៩ លោក ង៉ាន់  ភិរុណ  អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប  ឯកឧត្តម អ៊ឹង ហឿន ប្រធានក្រុមប្រឹក្សាខេត្ត  បានជួបពិភាក្សាការងារជាមួយ  ឯកឧត្តម ឈិន ហាវ( H.E. CHEN HAO ) លេខាធិការបក្សកុម្មុយនីស្តចិនខេត្តយូណាន់ នៃសាធារណរដ្ឋប្រជាមានិតចិន ដើម្បីពង្រឹងទំនាក់ទំនងមិត្តភាព និងកិច្ចសហប្រតិបត្តិការអន្តជាតិ ដោយប្រព្រឹត្តិទៅនៅ សណ្ឋាគារសុខាអង្គរ ក្រុងសៀមរាប ខេត្តសៀមរាប 

      ឯកឧត្តម ឈិន ហាវ បានស្នើសុំបន្តការផ្លាស់ប្តូរទស្សនកិច្ចទៅវិញទៅមក  និងសូមអញ្ជើញថ្នាក់ដឹកនាំ និងមន្រ្តីទៅទស្សនកិច្ចខេត្តយូណាន ដេីម្បីជំរុញការអនុវត្តជាក់ស្តែងលើកិច្ចសហប្រតិបត្តិការលើវិស័យសេដ្ឋកិច្ច និងទេសចរណ៍ ដោយសារខេត្តទាំងពីរមានបទពិសោធន៍ និងមូលដ្ឋានការងារជាច្រើនស្រដៀងគ្នា  និងសូមអញ្ជើញគណៈប្រតិភូសៀមរាប ចូលរួមវេទិការទេសចរណ៍នៅខេត្តយូណាន់នាពេលខាងមុខនាឆ្នាំនេះ។ 

       គួរបញ្ជាក់ថា  ខេត្តសៀមរាប  និងខេត្តយូណាន  នៃសាធារណរដ្ឋប្រជាមានិតចិន បានចុះហត្ថ លេខាភ្ជាប់ទំនាក់ ទំនងមិត្តភាព ជាមួយគ្នាមានរយៈពេល ១៣ឆ្នាំមកហើយ គឺចាប់ពីថ្ងៃទី២១ ខែមេសា ឆ្នាំ២០០៦មក តាមរយៈកិច្ចព្រមព្រៀងទ្វេភាគី ដោយបានផ្តោតលើ វិស័យសេដ្ឋកិច្ច ពាណិជ្ជកម្ម វិទ្យាសាស្រ្តសង្គម និងបច្ចេកវិទ្យា វប្បធម៌-សិល្បៈ អប់រំ កីឡា ទេសចរណ៍ កសិកម្ម រដ្ឋបាល...។ល។

       ដូច្នេះចាប់ពីឆ្នាំ២០១៩តទៅ ខេត្តយូណាន់ នឹងពង្រឹងកិច្ចសហប្រតិបត្តិការលើវិស័យសុខាភិបាល តាមរយៈការបញ្ជូនក្រុមគ្រូពេទ្យមកធ្វើការព្យាបាលប្រជាពលរដ្ឋ និងបំពាក់សម្ភារ សុខាភិបាលមួយចំនួន ហើយសុំឱ្យបញ្ជូនក្រុមគ្រូពេទ្យខេត្តសៀមរាប ទៅសិក្សាវគ្គបណ្តុះបណ្តាលរយៈពេលខ្លីនៅខេត្ត យូណាន។  ចំពោះវិស័យអប់រំ ខេត្តយូណាន នឹងផ្តល់អាហារូបករណ៍ ដល់និស្សិត  ដែលនៅនៅខេត្តសៀមរាប អោយសិក្សានៅខេត្តយូណាន  ដោយសព្វថ្ងៃ  ខេត្តយូណាន  មាននិសិត្សខ្មែរមួយចំនួន  បាននឹងកំពុងសិក្សានៅខេត្តយូណាន៕ មុនីរម្យ

ប្រភព៖ រដ្ឋបាលខេត្តសៀមរាប