នាថ្ងៃសុក្រ ២រោច ខែផល្គុន ឆ្នាំច សំរឹទ្ឋស័ក ព.ស ២៥៦២ ត្រូវនិងថ្ងៃទី២២ ខែ មីនា ឆ្នាំ២០១៩នេះ
លោក ពិន ប្រាកដ អភិបាលរងខេត្តសៀមរាប បានដឹកនាំក្រុមគ្រូពេទ្យស្ម័ត្រចិត្ត ក្រុងថៃចូវ ខេត្តជាំងស៊ូ នៃសាធារណរដ្ឋប្រជាមានិតចិន ដោយមានការចូលរួមពីសមាគមពាណិជ្ជកម្មចិនប្រចាំខេត្ត និង មន្ទីរពេទ្យចិន រស្មីអង្គរ ព្រមទាំងប្រធានការិយាល័យកុងស៊ុលចិនប្រចាំនៅខេត្តសៀមរាប ចុះធ្វើការពិគ្រោះ ពិនិត្យ ព្យាបាលជម្ងឺជូនប្រជាពលរដ្ឋ ក្នុងឃុំត្បែង ស្រុកបន្ទាយស្រី ខេត្តសៀមរាប ដោយឥតគិតថ្លៃ នៅមណ្ឌលសុខភាពត្បែង។
តាមការបញ្ជាក់របស់លោកអនុប្រធានសមាគមពាណិជ្ជកម្មចិនប្រចាំខេត្ត និង ប្រធានការិយាល័យកុងស៊ុលចិន ប្រចាំនៅខេត្តសៀមរាប បានឲ្យដឹងថា កម្ពុជា និង ប្រទេសចិន មានទំនាក់ទំនងសហប្រតិបត្តិការនឹងគ្នាជាង១ពាន់ឆ្នាំមកហើយ រហូតមកដល់បច្ចុប្បន្ននេះបានធ្វើឲ្យកិច្ចសហប្រតិបត្តិការជាមិត្តភាព កាន់តែរឹងមាំរវាងរដ្ឋាភិបាលប្រទេសទាំងពីរ និងប្រជាជននៃប្រទេសទាំងពីរកាន់តែនៅជាប់គ្នាជានិច្ច ។ លោកបានបន្តទៀតថា ក្នុងការព្យាបាលជម្ងឺនេះ លើជម្ងឺទូទៅ ជម្ងឺសន្លាក់ លើសឈាម និង ព្យាបាលឆ្អឹង ដោយឥតគិតថ្លៃពីបងប្អូនឡើយ ។
មានប្រសាសន៍សំណេះសំណាលនោះលោកអភិបាលរងខេត្ត បានបញ្ជាក់ថា សុខភាព គឺជាកត្តាចំបងដែលមនុស្សយើងគ្រប់រូប ដែលត្រូវយកចិត្តទុកដាក់ខ្ពស់ឲ្យបានជាប្រចាំថ្ងៃ ។ ដូច្នេះសុខភាពគឺជាកត្តាដ៏សំខាន់បំផុត សម្រាប់មនុស្សជាតិគ្រប់រូប ក្នុងការអនុវត្តន៍របៀបរស់នៅប្រកបដោយសុខមាលភាពរបស់យើងគ្រប់រូប។ ដោយកត្តានេះហើយទើប ប្រមុខរាជរដ្ឋាភិបាលកម្ពុជា ដែល មានសម្តេចតេជោ ហ៊ុន សែន នាយករដ្ឋមន្ត្រី បានធ្វើការជម្រុញឲ្យក្រសួងសុខាភិបាល ធ្វើកិច្ចសហការជាមួយ អង្គការដៃគូ ដើមី្បចុះមកធ្វើការពិនិត្យព្យាបាលជូនប្រជាពលរដ្ឋ នៅតាមមូលដ្ឋានដោយឥតគិតថ្លៃ ក្នុងការកាត់បន្ថយភាពក្រីក្ររបស់ប្រជាពលរដ្ឋ ។ លោកអភិបាលរងខេត្ត ក៏បានបន្តទៀតថា ដើមី្បផ្តល់សេវាសុខភាពជូនប្រជាពលរដ្ឋ គឺដើមី្បធ្វើឲ្យមានសុខភាពល្អ សម្រាប់ប្រកបកិច្ចការងារ រៀនសូត្រ ធ្វើស្រែ ចំការជាដើម ។ ម៉្យាងទៀត ការពិនិត្យព្យាបាលជម្ងឺជូនបងប្អូន នាពេលនេះ ក្រុមគ្រូពេទ្យយើងមិនរើសអើង ឬ ប្រកាន់ន្និនាការណ៍នយោបាយណាឡើយ គឺធ្វើការព្យាបាលដោយឥតគិតថ្លៃជូនទាំងអស់ ដូច្នេះបុគ្គលដែលមានសុខភាពល្អ គឺ មាននូវគុណភាពនៃជីវិត សមត្ថភាពគ្រប់គ្រាន់ ក្នុងការទទួលខុសត្រូវរាល់សកម្ម ភាពការងារ កាតព្វកិច្ច តួនាទី និង ការប្រកបការងារផ្សេងៗ ក្នុងការចិញ្ចឹមជីវិត និង ចូលរួមអភិវឌ្ឍន៍សង្គម ។
ក្នុងនោះលោក ពិន ប្រាកដ អភិបាលរងខេត្ត ក៏បានធ្វើការថ្លែងអំណរគុណ ចំពោះកិច្ចសហប្រតិបត្តិការរបស់ក្រុមគ្រូពេទ្យថៃចូវ ខេត្តជាំងស៊ូ និង មន្ទីរពេទ្យចិន រស្មីអង្គរ សមាគមពាណិជ្ជកម្មចិនប្រចាំខេត្ត អាជ្ញាធរមូលដ្ឋាន និង ក្រុមគ្រូពេទ្យ និង សប្បុរសជនដែលជាដៃគូរទាំងអស់បានគាំទ្រ ដែលបានយកចិត្តទុកដាក់ ក្នុងការព្យាបាលជម្ងឺ ជូនដល់ប្រជាពលរដ្ឋនៅឃុំត្បែង ស្រុកបន្ទាយស្រី គឺ ដើមី្បឆ្លើយតបទៅនឹងសំណូមពររបស់រដ្ឋបាលខេត្តសៀមរាប ក្នុងការជួយសម្រាលទុក្ខលំបាក របស់ប្រជាពលរដ្ឋ ក្រីក្រ ក្នុងការផ្សាភ្ជាប់មនោសញ្ចេតនារវាងប្រជាជនទាំងពីរ កម្ពុជា ចិន ទៀតផង៕ មុនីរម្យ
ប្រភព៖ រដ្ឋបាលខេត្តសៀមរាប