ក្រុមប្រឹក្សាខេត្តកណ្តាល បើកកិច្ចប្រជុំសាមញ្ញលើកទី៥៨ អាណត្តិទី២ ក្រោមអធិបតីភាព ឯកឧត្តម នួន ផា ប្រធានក្រុមប្រឹក្សាខេត្ត និងលោក គីម រឹទ្ធី អភិបាលរងខេត្ត នាព្រឹកថ្ងៃព្រហស្បតិ៍ ៩ កើត ខែផល្គុន ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី១៤ ខែមីនា ឆ្នាំ២០១៩។ អង្គប្រជុំនេះបានពិនិត្យ ពិភាក្សា និងធ្វើការអនុម័តលើរបៀបវារៈចំនួន ១០របស់ សមាជិកក្រុមប្រឹក្សាខេត្ត និង បានលើកឡើងផ្តោតលើចំណុចមួយចំនួន ជាពិសេស បញ្ហាការងារចរាចរណ៍ បញ្ហាការងារសណ្តាប់ធ្នាប់សាធារណៈ។
ឯកឧត្តម នួន ផា ប្រធានក្រុមប្រឹក្សាខេត្ត បានមានប្រសាសន៍បូកសរុប និងវាយតម្លៃកិច្ចប្រជុំ ដោយបានកោតសរសើរដល់អាជ្ញាធរ មន្ត្រីគ្រប់ផ្នែក ដែលបានយកចិត្តទុកដាក់ទទួលខុសត្រូវបំពេញការងារតាមតួនាទី ភារកិច្ចទទួលបានលទ្ធផលល្អ គ្រប់ផ្នែកជំនាញ។ ម្យ៉ាងទៀតត្រូវខិតខំយកចិត្តទុកដាក់ថែរក្សាបរិស្ថាន អនាម័យ និងសោភ័ណភាព ខណ:ពេលដែលខេត្តកណ្តាល ត្រៀមរៀបចំសង្ក្រាន្តដែលមាន រយៈពេល ៣ថ្ងៃ គឺពីថ្ងៃ១៤ ដល់ ១៦ ខែមេសា ឆ្នាំ២០១៩ នៅមាត់ទន្លេក្រុងតាខ្មៅ ដើម្បីអបអរសាទរបុណ្យចូលឆ្នាំថ្មី ប្រពៃណីជាតិខ្មែរ និងឈានចូលមកដល់នាពេលខាងមុខ។ ឯកឧត្តម បន្តថា ទោះជាមានការរីកចម្រើនយ៉ាងនេះក្ដី ក៏នូវមានចំណុចខ្វះខាតមួយចំនួនដែលអង្គភាព ស្ថាប័នមួយចំនួនពុំទាន់បានបំពេញការងារតាមតម្រូវការនៃការអភិវឌ្ឍ របស់ខេត្ត ដូច្នេះយើងត្រូវខិតខំប្រឹងប្រែងបន្តទៀត ដើម្បីឱ្យដំណើរការអភិវឌ្ឍរបស់ខេត្តកណ្តាលប្រព្រឹត្តទៅប្រកបដោយប្រសិទ្ធភាព តម្លាភាព និងគណនេយ្យភាព ស្របតាម គោលនយោបាយយុទ្ធសាស្ត្រចតុកោណតំណាក់កាលទី៤ នៃរាជរដ្ឋាភិបាលកម្ពុជា។
លោក គីម រិទ្ធី អភិបាលរងខេត្តកណ្តាល ក៏បានធ្វើការអនុញ្ញាតដល់បណ្តាមន្ទីរ ជំនាញពាក់ព័ន្ធ ធ្វើការបកស្រាយបំភ្លឺ នូវរាល់គ្រប់បញ្ហា ដែលជាសមាជិកក្រុមប្រឹក្សាខេត្ត បានលើកឡើងនៅក្នុងកិច្ចប្រជុំសាមញ្ញក្រុមប្រឹក្សានេះ អោយអស់ចម្ងល់ផងដែរ។ លោក ក៏បានក្រើនរំលឹកដល់ថ្នាក់ដឹកនាំមន្ទីរ ជំនាញពាក់ព័ន្ធ អាជ្ញាធរក្រុង ត្រូវចាត់វិធានការដើម្បីធ្វើការអនុវត្តចំពោះបញ្ហាទាំងនេះ ហើយក៏បានធ្វើការសំណូមពរអោយកម្លាំងសមត្ថិកិច្ចនគរបាល និងកងកម្លាំងទាំងអស់ ធ្វើកិច្ចសហការគ្នា ត្រួតពិនិត្យ និងត្រូវយកចិត្តទុកដាក់ឡើងវិញនូវច្បាប់ចរាចរណ៍ និងការធ្វើចរាចរណ៍ នៅដងផ្លូវ ក្នុងការកាត់បន្ថយនូវការគ្រោះថ្នាក់ចរាចរណ៍ ដែលបុណ្យចូលឆ្នាំថ្មីប្រពៃណីជាតិខ្មែរយើង និងឈានចូលមកដល់នាពេលខាងមុខនេះហើយ៕ រតនា
ប្រភព៖ រដ្ឋបាលខេត្តកណ្តាល