ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានអញ្ជើញជាអធិបតីក្នុងពិធីបិតសន្និបាតបូកសរុបវាយតម្លៃសភាពការណ៍ លទ្ធផលកិច្ចប្រតិបត្តិការ ឆ្នាំ២០១៨ របស់ស្នងការនគរបាលខេត្តកំពង់ស្ពឺ និងផ្សព្វផ្សាយទិសដៅរបស់អគ្គស្នងការនគរបាលជាតិ និងក្រសួងមហាផ្ទៃឆ្នាំ២០១៩ នារសៀលថ្ងៃព្រហស្បតិ៍ ៩កើត ខែផល្គុន ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី១៤ ខែមីនា ឆ្នាំ២០១៩។
បន្ទាប់ពីបានស្តាប់របាយការណ៍សង្ខេបរួចមក ឯកឧត្តម វ៉ី សំណាង អភិបាលខេត្ត បានធ្វើការវាយតម្លៃខ្ពស់ចំពោះកិច្ចខិតខំប្រឹងប្រែងអនុវត្តការងារនាពេលកន្លងមក ដែលយើងបានខិតខំបំពេញការងារផ្សេងៗ ទាក់ទងនឹងសេវាសាធារណៈផ្សេងៗជូនប្រជាពលរដ្ឋបានយ៉ាងល្អប្រសើរ។
ជាមួយគ្នានោះ ឯកឧត្តមអភិបាល បានជម្រុញដល់សមត្ថកិច្ចពាក់ព័ន្ធគ្រប់ជាន់ថ្នាក់ ត្រូវតែចូលរួមអនុវត្ត នូវគោលនយោបាយភូមិ-ឃុំមានសុវត្ថិភាព ឲ្យបានម៉ឺងម៉ាត់លើកិច្ចការងាររក្សាសន្តិសុខជូនប្រជាពលរដ្ឋក្នុងមូលដ្ឋានឲ្យបានល្អ ត្រូវលុបបំបាត់ភាពអសកម្មនៅក្នុងមូលដ្ឋានកុំឲ្យកើតមានឡើង ដូចជា៖ ល្បែងស៊ីសង ក្មេងទំនើង និងការចរាចរណ៍ប្រើប្រាស់គ្រឿងញៀនជាដើម ដែលបញ្ហាទាំងនេះ សមត្ថកិច្ច អាជ្ញាធរមូលដ្ឋានត្រូវមានការសហការគ្នា ពិសេសចុះមូលដ្ឋានឲ្យបានជាប្រចាំ។
ឯកឧត្តម បានសង្គត់ធ្ងន់ថា ៖ នៅឆ្នាំ២០១៩នេះ ប្រទេសកម្ពុជាយើង អាចប្រឈមទៅនឹងការខ្វះខាត់ទឹកសម្រាប់ប្រើប្រាស់ ហើយកន្លងទៅប្រមុខរាជរដ្ឋាភិបាលកម្ពុជា បានចេញសារចណែនាំស្តីពីការថែរក្សាទឹកទុកសម្រាប់ប្រើប្រាស់ ដោយមិនអនុញ្ញាតឲ្យមានការបង្កបង្កើតផលស្រូវប្រាំងជាលើកទី២នោះទេ ដោយត្រូវរក្សាទុកទឹក សម្រាប់ប្រើប្រាស់ប្រចាំថ្ងៃ អនុញ្ញាតឲ្យធ្វើតែដំណាំរួមផ្សំក្រៅពីដំណាំស្រូវ។ ហើយគ្រប់ស្ថាប័នពាក់ពាក់ព័ន្ធត្រូវត្រៀមឲ្យបានជាស្រេច ដើម្បីជួយសង្គ្រោះ និងដោះស្រាយទឹកជូនប្រជាពលរដ្ឋឲ្យបានទាន់ពេលវេលា៕ រតនា
ប្រភព៖ រដ្ឋបាលខេត្តកំពង់ស្ពឺ
