នាព្រឹកថ្ងៃព្រហស្បតិ៍ ៩កើត ខែផល្គុន ឆ្នាំច សំរឹទិ្ធស័ក ព.ស ២៥៦២ ត្រូវនឹងថ្ងៃទី១៤ ខែមីនា ឆ្នាំ ២០១៩ រដ្ឋបាលខេត្តកំពង់ចាម បើកវគ្គបណ្តុះបណ្តាលស្តីពីការងារ គណនេយ្យភាព សង្គមដល់គ្រូបង្គោលថ្នាក់ខេត្ត និងគ្រូបង្គោលថ្នាក់ស្រុក ក្រោមអធិបតីភាព ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធាន គណៈកម្មាធិការគ្រប់គ្រងការអនុវត្តផែនការយុទ្ធសាស្រ្ត គណនេយ្យ ភាពសង្គម និងឯកឧត្ដម គួច ចំរើន អភិបាល នៃគណៈអភិបាល ខេត្តកំពង់ចាម ។
ឯកឧត្ដម គួច ចំរើន អភិបាលខេត្តកំពង់ចាម មានប្រសាសន៍ថា នេះជាលើកដំបូងហើយ សម្រាប់ខេត្តកំពង់ចាម ដែលគណៈកម្មាធិការគ្រប់គ្រង ការអនុវត្តផែនការយុទ្ធសាស្រ្តគណនេយ្យភាពសង្គម បានពង្រីកខេត្តគោលដៅ អនុវត្តការងារគណនេយ្យភាពសង្គម សំដៅចូលរួមចំណែក ដល់ការពង្រឹងអភិបាលកិច្ច តាមបែបប្រជាធិតេយ្យ នៅថ្នាក់មូលដ្ឋាន និងបានផ្តោតទៅលើការពង្រឹងភាពជាដៃគូរវាង រដ្ឋបាលថ្នាក់ខេត្ត ស្រុក ឃុំ ជាមួយប្រជាពលរដ្ឋ ។ ការលើកកម្ពស់នូវសិទ្ធិអំណាច របស់ប្រជាពលរដ្ឋ និងគណនេយ្យភាព របស់រដ្ឋបាលថ្នាក់ក្រោមជាតិនេះ ជាគន្លឹះសំខាន់ សំដៅឲ្យការអនុវត្តកិច្ចដំណើរការ កំណែទម្រង់ការអភិវឌ្ឍ តាមបែបប្រជាធិបតេយ្យ នៅថ្នាក់ក្រោមជាតិ ឲ្យកាន់តែមានប្រសិទ្ធភាព ។ ជាមួយគ្នានោះដែរ ដើម្បីសម្រេចបាននូវកិច្ចការទាំងនេះ តម្រូវឲ្យមានការចូលរួមពីប្រជាពលរដ្ឋ និងអង្គការសង្គមស៊ីវិលដោយផ្ទាល់ និងប្រយោល ដើម្បីធានាឲ្យបានគណនេយ្យភាពសង្គមយ៉ាងពិតប្រាកដ ។ មួយផ្នែកទៀត ក្នុងកិច្ចដំណើរការកំណែទម្រង់ការអភិវឌ្ឍ តាមបែបប្រជាធិបតេយ្យ នៅថ្នាក់ក្រោមជាតិ ការអនុវត្តគណនេយ្យភាពសង្គម សំដៅផ្តល់នូវសិទ្ធិអំណាច ជូនប្រជាពលរដ្ឋមូលផងដែរ ។
ឯកឧត្ដម ងី ច័ន្ទ្រផល រដ្ឋលេខាធិការក្រសួងមហាផ្ទៃ បានលើកឡើងថា វគ្គបណ្ដុះបណ្ដាលនេះ មានគោលបំណងដើម្បីផ្ដល់ចំណេះដឹងជាមូលដ្ឋានអំពី «ផែនការយុទ្ធសាស្ត្រ ស្ដីពីការងារគណនេយ្យភាពសង្គម សម្រាប់អភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ» ដល់ក្រុមការងារ គណនេយ្យភាពសង្គមថ្នាក់ខេត្ត និងគ្រូឧទ្ទេសថ្នាក់ស្រុក ដើម្បីមានលទ្ធភាពបណ្ដុះបណ្ដាលបន្ត ទៅដល់អង្គភាពផ្ដល់សេវា អំពី «ផែនការអនុវត្តគណនេយ្យភាពសង្គម សម្រាប់អភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ» ដោយផ្ដោតការយកចិត្តទុកដាក់ទៅលើ ការពង្រឹងភាពងាយទទួលបានព័ត៌មាននានា និងព័ត៌មានថវិកា ការត្រួតពិនិត្យតាមដានដោយប្រជាពលរដ្ឋ ការសម្របសម្រួល និងការពង្រឹងសមត្ថភាព ព្រមទាំង ការប្រមូលមេរៀនបទពិសោធន៍ និងការត្រួតពិនិត្យតាមដានផងដែរ ។ ឯកឧត្ដមរដ្ឋលេខាធិការ បានលើកឡើងថា ផែនការយុទ្ធសាស្រ្តគណនេយ្យភាពសង្គមនេះ អនុម័តដំបូងនៅឆ្នាំ២០១៣ ដើម្បីអនុវត្តសាកល្បង ៣ឆ្នាំ គឺឆ្នាំ ២០១៦-២០១៨ ក្នុងគោលបំណង ដើម្បីពង្រឹងសិទ្ធិប្រជាពលរដ្ឋ និងសហគមន៍ថ្នាក់មូលដ្ឋាន ក្នុងការចូលរួម និងការចាត់ចែង ការប្រើប្រាស់ធនធាន និងការផ្ដល់សេវាសាធារណៈ ថ្នាក់ក្រោមជាតិ ដែលផ្ដោតជាសំខាន់ទៅលើ ការបង្កលក្ខណៈងាយស្រួលដល់ប្រជាពលរដ្ឋ និងសហគមន៍មូលដ្ឋាន ឲ្យទទួលបានព័ត៌មាន និងធ្វើការពិភាក្សាជាមួយប្រជា ពលរដ្ឋ ដើម្បី ត្រួតពិនិត្យដំណើរការអភិវឌ្ឍនរបស់អាជ្ញាធរថ្នាក់ក្រោមជាតិ ។ ដូច្នេះ វគ្គបណ្ដុះបណ្ដាល រយៈពេល ២ថ្ងៃនេះ ពិតជាមានសារៈសំខាន់ណាស់ ដែលអស់លោក លោកស្រី ជាសិក្ខាមទាំងអស់ នឹងទទួលបាននូវពុទ្ធិថ្មីៗបន្ថែមទៀត ដើម្បីយកទៅផ្សព្វផ្សាយបន្ត និងអនុវត្តជាក់ស្ដែង នៅក្នុងមូលដ្ឋាននីមួយៗ ប្រកបដោយលទ្ធផលផ្លែផ្កា ៕ មុនីរម្យ
ប្រភព៖ រដ្ឋបាលខេត្តកំពង់ចាម
