នៅសាលប្រជុំសាលាខេត្តរតនគិរី បានរៀបចំពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តរតនគិរី ដែលពិធីនេះបានប្រព្រឹត្តទៅក្រោមអធិបតីភាពឯកឧត្តម ឡាំ ជា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
លោកស្រី ញាណ ទិត្យចិន្តា ប្រធានមន្ទីរប្រៃសណីយ៍ និងទូរគមនាគមន៍ខេត្ត ត្រូវបានរាជរដ្ឋាភិបាលកម្ពុជា សម្រេចតែងតាំងជាអភិបាលរងខេត្តរតនគិរី បំពេញបន្ថែមក្នុងរចនាសម្ព័ន្ធជួរគណៈអភិបាលខេត្ត។
បន្ទាប់ពីមតិស្វាគមន៍ និងរបាយការណ៍សង្ខេបអំពីលទ្ធផលការងារដែលរដ្ឋបាលខេត្តសម្រេចបានរួចមក ឯកឧត្តម ឡាំ ជា រដ្ឋលេខាធិការក្រសួងមហាផ្ទៃ បានសម្តែងនូវការកោតសរសើរ និងវាយតម្លៃខ្ពស់ចំពោះលទ្ធផលការងារដែលរដ្ឋបាលខេត្តសម្រេចបាននាពេលកន្លងមកដោយរក្សាបាននូវសន្តិសុខ សណ្តាប់ធ្នាប់សង្គម និងមានការអភិវឌ្ឍលើគ្រប់វិស័យ រសៀលថ្ងៃទី១១ ខែមីនា ឆ្នាំ២០១៩នេះ។ ទន្ទឹមគ្នានេះ ឯកឧត្តមរដ្ឋលេខាធិការ បានផ្តាំផ្ញើអភិបាលរងខេត្ត ដែលទើបតែប្រកាសចូលកាន់មុខតំណែង សហការរួមគ្នាបង្កើនប្រសិទ្ធភាពការងារនៅក្នុងអង្គភាព ព្រមទាំងប្រសិទ្ធភាពនៃការផ្តល់សេវាជូនពលរដ្ឋ៕ មុនីរម្យ
ប្រភព៖ រដ្ឋបាលខេត្តរតនគិរី