នាព្រឹកថ្ងៃព្រហស្បតិ៍ ២កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៧ ខែមីនា ឆ្នាំ២០១៩ រដ្ឋបាលខេត្តប៉ៃលិន បិទសន្និបាតបូកសរុបលទ្ធផលការងារ ប្រចាំឆ្នាំ២០១៨ និងលើកទិសដៅការងារឆ្នាំ២០១៩ ក្រោមអធិបតីដ៏ខ្ពង់ខ្ពស់ ឯកឧត្តម កែ គឹមយ៉ាន ឧបនាយករដ្ឋមន្ដ្រី និងមានការអញ្ជើញចូលរួមពីថ្នាក់ដឹកនាំជុំវិញខេត្តជាច្រើនផងដែរ។
ឯកឧត្តម កែ គឹមយ៉ាន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា ក្នុងនាមរាជរដ្ឋាភិបាល សូមថ្លែងការកោតសសើរដល់សមត្ថកិច្ចគ្រប់លំដាប់ថ្នាក់ ព្រមទាំងប្រជាពលរដ្ឋទូទាំងខេត្តដែលបានចូលរួមជាមួយរាជរដ្ឋាភិបាលក្នុងការកសាង និងថែរក្សាសន្តិភាព និងការអភិវឌ្ឍប្រទេសជាតិដែលបានធ្វើឲ្យខេត្តប៉ៃលិនប្រែក្លាយពីតំបន់ប្រយុទ្ធទៅជាតំបន់ដែលមានការអភិវឌ្ឍគ្រប់វិស័យ។ ឯកឧត្តមបានធ្វើការណែនាំដល់រដ្ឋបាលគ្រប់ថ្នាក់ មន្ទីរ អង្គភាព និងកងកម្លាំងមានសមត្ថកិច្ចក្នុងខេត្តប៉ៃលិនទាំងមូល ត្រូវខិតខំរួមគ្នា សម្រេចឲ្យបាននូវកិច្ចការសំខាន់ៗដូចជា : ១.ការពង្រឹងសន្តិភាព និងស្ថិរភាពនយោបាយ, ២.សន្តិសុខ សណ្តាប់ធ្នាប់សាធារណៈ សុវត្ថិភាពសង្គម ការគ្រប់គ្រងធនធានធម្មជាតិ, ៣.ការអភិវឌ្ឍសេដ្ឋកិច្ចសង្គម, ៤.កំណែទម្រង់វិមជ្ឈការ និងវិសហមជ្ឈការ, ៥.ការផ្តល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន, ៦.ពីគ្រោះរាំងស្ងួត, ៧.ការពង្រឹងរបៀបរបបការងារ, ៨.ទំនាក់ទំនងជាមួយប្រទេសជិតខាង, ៩.ការងារជំរឿនប្រជាពលរដ្ឋទូទាំងខេត្តប៉ៃលិន៕ គឹមអាន
ប្រភព៖ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន