នៅស្នងការដ្ឋាននគរបាលខេត្តកំពង់ចាម ធ្វើពិធីបិទសន្និបាតបូកសរុបសភាពការណ៍ កិច្ចប្រតិបត្តិការរក្សាសន្តិសុខ សណ្ដាប់ធ្នាប់សង្គមប្រចាំឆ្នាំ២០១៨ និងទិសដៅការងារឆ្នាំ២០១៩ របស់ស្នងការដ្ឋាននគរបាលខេត្តកំពង់ចាម និងផ្សព្វផ្សាយទិសដៅការងារ ឆ្នាំ២០១៩ របស់អគ្គស្នងការដ្ឋាននគរបាលជាតិ ក្រោមអធិបតីភាព ឯកឧត្តម ឧត្តមសេនីយ៍ឯក សេក ភូមី អគ្គស្នងការរងនគរបាលជាតិ តំណាង ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម និងប្រតិភូអមដំណើរ ដោយមានការអញ្ជើញចូលរួមពី លោកឧត្តមសេនីយ៍ទោ ស្នងការនគរបាលខេត្ត លោកមេបញ្ជាការកងរាជអាវុធហត្ថខេត្ត លោកមេបញ្ជាការតំបន់ប្រតិបត្តិការសឹករងខេត្ត លោកប្រធានសាលាដំបូងខេត្ត លោកព្រះរាជអាជ្ញាខេត្ត ភ្ញៀវកិត្តិយសរួមមាន លោកអភិបាលក្រុង ស្រុក និងដោយមានការចូលរួមពីលោក លោកស្រី ស្នងការរង លោកអនុប្រធានផែន លោក លោកស្រី នាយ នាយរងការិយាល័យ លោកអធិការ លោកអធិការរងនគរបាលក្រុង ស្រុកទាំង១០ លោកនាយប៉ុស្តិ៍នគរបាលរដ្ឋបាលឃុំ សង្កាត់ទាំង១០៩ សរុបចំនួន ៣៧០នាក់ នារសៀលថ្ងៃពុធ ១កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៦ ខែមីនា ឆ្នាំ២០១៩។
ជាកិច្ចចាប់ផ្តើមលោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម ឡើងធ្វើសុន្ទរកថាស្វាគមន៍និងរាយការណ៍អំពីលទ្ធផលនៃអង្គសន្និបាត។
ជាកិច្ចបន្ត ឯកឧត្តម គួច ចំរើន បានអបអរសាទរដល់កងកម្លាំងនគរបាល ទូទាំងខេត្តកំពង់ចាម ចំពោះជ័យលាភី ដែលទទួលបានចំណាត់ថ្នាក់លេខ១ ទូទាំងប្រទេស ៤ឆ្នាំជាប់គ្នា ក្នុងការប្រឡងប្រណាំងគោលនយោបាយភូមិ ឃុំមានសុវត្ថិភាព ហើយផ្តាំផ្ញើដល់មន្រ្តីនគរបាល ទាំងអស់ត្រូវសាមគ្គីគ្នា ខិតខំប្រឹងប្រែងធ្វើការងារ ដើម្បីទទួលភាពជោគជ័យ និងការពារសន្តិសុខសណ្តាប់ធ្នាប់សាធារណៈ ដើម្បីភាពសុខសាន្តជូនបងប្អូនប្រជាពលរដ្ឋ ឆ្ពោះទៅរកសុខសន្តិភាព និងមានការរីកចំរើនទាំងបច្ចុប្បន្ន និងពេលអនាគត។ ហើយឯកឧត្តមអភិបាលខេត្ត សំណូមពរឱ្យប៉ុស្តិ៍នគរបាលរដ្ឋបាលធ្វើការផ្សព្វផ្សាយដល់បងប្អូនប្រជាពលរដ្ឋត្រូវបង្កើនការប្រុងប្រយ័ត្នខ្ពស់ ចំពោះបញ្ហាអគ្គិភ័យ ហើយបច្ចុប្បន្នដោយអាកាសធាតុមានភាពប្រែប្រួល ដោយមានកម្តៅខ្លាំង ដូច្នេះអាចបង្កឱ្យកើតជាចំហេះ និងពិសេសនោះលើបញ្ហាគ្រោះរាំងស្ងួតនិងសំណូមពរឱ្យបងប្អូនប្រជាពលរដ្ឋទិញបំពង់ពន្លត់អគ្គិភ័យដើម្បីពន្លត់បឋមនឹងរាយការណ៍ជាបន្ទាន់ដល់សមត្ថកិច្ច ដើម្បីជួយអន្តរាគមន៍ឱ្យទាន់ពេល។
មានប្រសាសន៍បិទសន្និបាតក្នុងឱកាសនោះ ឯកឧត្តម ឧត្តមសេនីយ៍ឯក សេក ភូមី តំណាងឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ បានកោតសរសើរចំពោះស្នងការនគរបាលខេត្តកំពង់ចាម ដែលបានដឹកនាំកងកម្លាំង ក្នុងការងាររក្សាការពារសន្តិសុខ សណ្តាប់ធ្នាប់សង្គមបានយ៉ាងល្អប្រសើរ ជូនប្រជាពលរដ្ឋ និងវិនិយោគទុនជាតិ អន្តរជាតិ ជាពិសេសបានអភិវឌ្ឍអង្គភាព ចាប់តាំងពីថ្នាក់ស្នងការដ្ឋាននគរបាលខេត្ត រហូតដល់ប៉ុស្តិ៍រដ្ឋបាលឃុំសង្កាត់។ ព្រមទាំងបានសំណូមពរដល់កងកម្លាំងទាំងអស់ត្រូវបន្តការងារឱ្យបានល្អបន្ថែមទៀត ជាពិសេសអនុវត្តគោលនយោបាយភូមិ-ឃុំ មានសុវត្ថិភាព ឲ្យបានល្អបន្ថែមទៀត ចូលរួមបង្ក្រាបបទល្មើសគ្រឿងញៀន និងអនុវត្តន៍ច្បាប់ចរាចរណ៍ផ្លូវគោកឱ្យបានល្អបន្ថែមទៀត ដើម្បីកាត់បន្ថយគ្រោះថ្នាក់ចរាចរណ៍។
ចុងក្រោយនៃកម្មវិធី ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានឧបត្ថម្ភដល់ស្នងការដ្ឋាននគរបាលខេត្ត ចំនួន៥,០០០,០០០រៀល សម្រាប់ចាត់ចែងក្នុងកម្មវិធីនេះផងដែរ៕ រតនា
ប្រភព៖ រដ្ឋបាលខេត្តកំពង់ចាម