នៅថ្ងៃពុធ ១ កើត ខែផល្គុន ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី៦ ខែមីនា ឆ្នាំ២០១៩ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញជាអធិបតី ក្នុងពិធីអបអរសាទរទិវាអន្តរជាតិនារី ០៨ មីនា ខួបលើកទី ១០៨ ឆ្នាំ២០១៩ ក្រោមប្រធានបទ "លើកកម្ពស់សមភាពយេនឌ័រ និងគាំពារសង្គម ដើម្បីអភិវឌ្ឍន៍ធនធានមនុស្ស" ដោយមានការអញ្ជើញចូលរួមពី លោក ចា ឡាន់ ប្រធានក្រុមប្រឹក្សាស្រុកមណ្ឌលសីមា និងលោកស្រី លោក ហាក់ ឡេង អភិបាលស្រុក និងលោកស្រី ព្រមទាំងលោក លោកស្រី សមាជិក្រុមប្រឹក្សាស្រុក លោក លោកស្រី អភិបាលរងស្រុក លោក លោកស្រី ប្រធាន អនុប្រធានមន្ទីរជំនាញជុំវិញខេត្ត មន្រ្តីរាជការសាលាស្រុក អ្នកគ្រូ យុវជន ស ស យ ក យុវជន ក១២ សរុបប្រមាណ ២០០នាក់ នៅស្រុកមណ្ឌលសីមា។
លោកជំទាវ បានមានប្រសាសន៍ថា ប្រទេសកម្ពុជា មានការរីកចំរើនលើគ្រប់វិស័យ មានកិច្ចសហប្រតិបត្តិការល្អ តាមបណ្តាប្រទេសនានាលើពិភពលោក និងប្រទេសជិតខាង ដើម្បីរក្សាសុខសុវត្ថិភាព និងបូរណភាពទឹកដី ព្រមទាំងការអភិវឌ្ឍនានា ជាមួយនឹងការវិនិយោគលើសមាភាពយេនឌ័រ របស់រាជរដ្ឋាភិបាលកម្ពុជា ការអភិវឌ្ឍន៍សង្គមប្រកបដោយសមធម៌ និងបរិយាប័ន្ន ដោយមិនទុកអោយនរណាម្នាក់នៅឯកោ ព្រមទាំងធានាថា ស្ត្រី ក្មេងស្រី និងក្រុមជនងាយរងគ្រោះ ទទួលបានផលប្រយោជន៍ នៃកំណើនសេដ្ឋកិច្ចដ៏រឹងមាំ និងប្រកបដោយចីរភាព។ ដើម្បីពង្រឹងសមភាព យេនឌ័រ ការពង្រឹងភាពអង់អាចរបស់ស្ត្រី និងក្មេងស្រី និងការផ្តល់ការគាំពារសង្គម ដល់ប្រជាពលរដ្ឋក្រីក្រ និងក្រុមងាយរងគ្រោះ គឺជាកត្តាដ៏ចាំបាច់បំផុត ដើម្បីធានាបាននូវដំណើការ សង្គមប្រកបដោយសុខដុមរមនា៕អែមមី
ប្រភពៈ រដ្ឋបាលខេត្តកោះកុង