ដើម្បីបន្តនិរន្តភាពការងារ ពង្រឹងការងារគ្រប់គ្រង់ក្នុងមន្ទីរ បន្តផ្តល់សេវាសាធារណៈដល់គ្រប់វិស័យពាក់ព័ន្ធឲ្យកាន់តែមានប្រសិទ្ធភាព រដ្ឋបាលខេត្តកណ្តាល កាលពីព្រឹកថ្ងៃទី៥ ខែមិនា ឆ្នាំ២០១៩នេះ បានរៀបចំពិធី ប្រកាសតែងតាំងប្រធានមន្ទីរពាណិជ្ជកម្មខេត្តថ្មី ជំនួសប្រធានមន្ទីរចាស់ដែលត្រូវបានចូលនិវត្តន៍ ។
ថ្លែងក្នុងពិធីនេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានកោតសរសើរ និងថ្លែងអំណរគុណ ដល់អាជ្ញាធរខេត្ដកណ្ដាល ដែលបានផ្ដល់កិច្ចសហការល្អ និងតែងគាំទ្រដល់សកម្មភាពអភិវឌ្ឍន៍វិស័យពាណិជ្ជកម្ម ជាពិសេសការចូលរួមសហការណ៍គ្រប់គ្រងសកម្មភាពក្រុមហ៊ុន-សហគ្រាស គ្រប់គ្រង់និងការតាមដានស្ថានភាពថ្លៃទំនិញ រៀបចំព្រឹត្ដិការណ៍ពាណិជ្ជកម្មផ្សេងៗ និងការត្រួតពិនិត្យគុណភាពទំនិញ ក្នុងទីផ្សារ ព្រមទាំងការចុះផ្សព្វផ្សាយអំពីច្បាប់ និងបទបញ្ញត្ដិទាក់ទងវិស័យពាណិជ្ជកម្ម ជាដើម។
ជាពិសេសឯកឧត្តមរដ្ឋមន្ត្រី បានកោតសរសើរដល់អតីតប្រធានមន្ទីរពាណិជ្ជកម្មខេត្ត ដែលបានលះបង់កម្លាំងកាយចិត្តក្នុងការបំពេញការងារនាពេលកន្លងមក រហូតជំរុញឱ្យមន្ទីរពាណិជ្ជកម្មខេត្ដ ក្លាយទៅជាអង្គភាពមួយ ដែលទទួលបានការគាំទ្រពីសាធារណជន និងគណៈអភិបាលខេត្ដគ្រប់ជំនាន់។ ឯកឧត្តមរដ្ឋមន្ត្រី បានក្រើនរំលឹកដល់ ប្រធានមន្ទីរពាណិជ្ជកម្មថ្មី ត្រូវខិតខំយកចិត្តទុកដាក់បំពេញការងារ និងត្រូវចេះពង្រឹងកិច្ចសហការរវាងមន្ត្រីនៅក្នុងមន្ទីរ ។ លើសពីនេះ ត្រូវចេះដោះស្រាយបញ្ហាដោយផ្អែកលើគោលការណ៍ច្បាប់ ដើម្បីសម្រេចបាននូវលទ្ធផលថ្មីៗបន្ថែមជូនអង្គភាព ថ្នាក់ដឹកនាំខេត្ត និងក្រសួងពាណិជ្ជកម្ម ពិសេសសម្រួលដល់ការអភិវឌ្ឍវិស័យឯកជននៅក្នុងខេត្តកណ្តាលទាំងមូល។
ថ្លែងក្នុងពិធីនេះដែរ ឯកឧត្តម ម៉ៅ ភិរុណ អភិបាលនៃគណៈអភិបាលខេត្តកណ្តាល បានបញ្ជាក់អោយដឹងអំពីស្ថានភាពសេដ្ឋកិច្ចនៅខេត្តកណ្ដាលដែលមានកើនឡើងពីមួយឆ្នាំទៅមួយឆ្នាំ ជាក់ស្ដែងក្នុងឆ្នាំ២០១៧ សេដ្ឋកិច្ចខេត្តកណ្ដាលមានប្រមាណ ៨៦៦៩ ប៊ីលាន ៤៣៣,១ លានរៀល គិតជាដុល្លារប្រហែល ២១៥២ លានដុល្លារ។ ចំណូលសម្រាប់មនុស្សម្នាក់ៗមានចំនួន ១៧២៧ ដុល្លារនៅក្នុងឆ្នាំ ២០១៧ បើធៀបនឹងឆ្នាំ ២០១៦ មាន ១៥៤៦ ដុល្លារ ក្នុងនោះវិស័យកសិកម្មមាន ៤០,១% ឧស្សាហកម្មមាន ៣២, ៧% សេវាកម្ម ២៧,២%។ ចំណែកអត្រាភាពក្រីក្ររបស់ប្រជាពលរដ្ឋក្នុងខេត្តកណ្ដាលបានកាត់បន្ថយពី ១៣,៨៩% ភាគរយឆ្នាំ ២០១៧ មកត្រឹម ១៣,៧៧% ក្នុងឆ្នាំ ២០១៨។
សូមជម្រាបថា ការតែងតាំងនេះ យោងតាម លិខិតលេខ ២៣៩ ពណ បល.ប្រក ចុះថ្ងៃទី៤ ខែតុលា ឆ្នាំ២០១៨ របស់ក្រសួងពាណិជ្ជកម្មបានសំរេច តែងតាំងលោក អោម ប៊ុនធឿន ជាប្រធានមន្ទីរពាណិជ្ជកម្មខេត្តកណ្តាល ជំនួស លោក ឃឹម សុផល ដែលបានចូលនិវត្តន៍៕មុនីរម្យ
ប្រភព៖ រដ្ឋបាលខេត្តកណ្តាល