នៅថ្ងៃចន្ទ ១៣រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៤ ខែមីនា ឆ្នាំ២០១៩នេះ កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានប្រគល់ផ្ទះថ្មីចំនួន ២ខ្នង ជាព្រះរាជអំណោយរបស់សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជូនប្រជារាស្ត្រចំនួន ២គ្រួសារ រស់នៅស្រុកបរិបូរណ៍ ខេត្តកំពង់ឆ្នាំង។ ផ្ទះទាំងពីរខ្នងនេះប្រើពេលសាងសង់អស់រយៈពេល ៦០ថ្ងៃ ដែលផ្ទះនីមួយៗចំណាយថវិកា ៥.២៤៤,៥០ដុល្លារ (ប្រាំពាន់ពីររយសែសិបបួនដុល្លារ និងហាសិបសេន) មានទំហំ ៤m x ៦m សង់ពីថ្ម ប្រក់ហ្វីប្រូ ក្រាលការូ តតាកមុខផ្ទះស័ង្កសី និងចាក់សាបក្រោមតាកមុខផ្ទះ ៣m x ៤m ត្រូវបានប្រគល់ជូនគ្រួសារទី១ ម្ចាស់ផ្ទះឈ្មោះអ្នកស្រី ជា រ៉េន អាយុ ៣៥ឆ្នាំ ជាស្ត្រីមេម៉ាយទទួលបន្ទុកចិញ្ចឹមកូន ៤នាក់ ប្រកបរបរស៊ីឈ្នួលច្រូតស្រូវឱ្យគេ និងធ្វើល្អីលក់ រស់នៅភូមិកែវឡាត ឃុំពន្លៃ និងគ្រួសារទី២ ម្ចាស់ផ្ទះឈ្មោះ អ្នកស្រី អុល ធីតា អាយុ ៣២ឆ្នាំ និងស្វាមី ដែលមានកូនស្រី ២នាក់ រងគ្រោះដោយអំពើរំលោភសម្លាប់ រស់នៅភូមិថ្មី ឃុំផ្សារ។
ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា រួមជាមួយឯកឧត្តម ឈួរ ច័ន្ទឌឿន ប្រធានកិត្តិយសសាខាកាកបាទក្រហមកម្ពុជា ខេត្តកំពង់ឆ្នាំង បាន ពាំនាំនូវព្រះរាជបណ្តាំ និងប្រសាសន៍ផ្ដាំផ្ញើសួរសុខទុក្ខ ក្តីនឹករលឹកនិងអាណិតស្រឡាញ់ដ៏ជ្រាលជ្រៅពីសំណាក់ សម្ដេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះម្ចាស់ផ្ទះថ្មីទាំង ២ខ្នង និងប្រជារាស្ត្រទាំងអស់ ព្រមទាំងសូមផ្តាំផ្ញើឱ្យយកចិត្តទុកដាក់គិតគូរលើកកម្ពស់ជីវភាពគ្រួសារ ត្រូវខិតខំប្រកបរបចិញ្ចឹមជីវិត ជាពិសេស ថែទាំសុខភាពឱ្យបានល្អ មានអនាម័យក្នុងការរស់នៅ និងផឹកទឹកឆ្អិនដាំពុះជានិច្ច។ ដោយឡែក ចំពោះអ្នកស្រី ជា រ៉េន ដែលមានកូន ៤នាក់នោះ ត្រូវគិតគូរបញ្ជូនកូនទៅសាលារៀនដើម្បីក្រេបយកចំណេះដឹងដើម្បីអនាគតភ្លឺស្វាង មានសមត្ថភាពចិញ្ចឹមជីវិតនិងលើកស្ទួយជីវភាពគ្រួសារ ហើយជាពិសេស អាជ្ញាធរមូលដ្ឋាន ក៏ត្រូវយកចិត្តទុកដាក់គិតគូរជួយជំរុញអាណាព្យាបាលទាំងអស់ឱ្យបញ្ជូនកូនចៅទៅសាលារៀនឱ្យបានគ្រប់ៗគ្នាដែរ។
អំណោយសម្រាប់សង្កត់ផ្ទះនីមួយៗរួមមាន ៖ អង្ករ មី ត្រីខ ចាន ឆ្នាំង វែក ស្លាបព្រា ខ្ទះ កន្ទេល សាប៊ូ មុង ភួយ សារុង ក្រមា អាយឺត ចង្កៀងប្រើពន្លឺព្រះអាទិត្យ និងថវិកា ១លានរៀល។ ដោយឡែក ចាស់ៗឥតទីពឹងដែលរស់នៅជិតខាងចំនួន ២៦នាក់ ក្នុងម្នាក់ៗទទួលបាន ៖ អង្ករ មី ត្រីខ មុង ភួយ សារុង ក្រមា អាវយឺត ចង្កៀងប្រើពន្លឺព្រះអាទិត្យ និងថវិកាមួយចំនួន៕មុនីរម្យ
ប្រភព៖ រដ្ឋបាលកំពង់ឆ្នាំង