រយៈពេល១២ខែ ឆ្នាំ២០១៨ ភ្ញៀវទេសចរបរទេសចូលមក តាមច្រកទ្វារព្រំដែនអន្តរជាតិប៉ោយប៉ែតមានចំនួន ៤៥៦,៤៤១នាក់ និងមាន៩៥សញ្ជាតិ ។ ក្នុងនោះភ្ញៀវទេសចរត្រលប់ទៅវិញមានចំនួន ៤៧២,៩៨៩នាក់ ។ នេះបើយោងតាមរបាយការណ៍ភ្ញៀវទេសចរ ក្នុងរយៈពេល១២ខែ ឆ្នាំ២០១៨ ដែលបានលើកឡើងនៅក្នុងកិច្ចប្រជុំបូកសរុបការងារ សម្រួលដំណើរ និងដឹកជញ្ជូនភ្ញៀវ និងអ្នកដំណើរនៅតំបន់ ច្រកទ្វារព្រំដែនអន្តរជាតិប៉ោយប៉ែត ប្រចាំឆ្នាំ២០១៨ និងទិសដៅអនុវត្តបន្ត ដែលប្រព្រឹត្តទៅក្រោមអធិបតីភាព ឯកឧត្ដម ហោ សារុន អនុរដ្ឋលេខាធិការក្រសួងទេសចរណ៍ និងជាប្រធានលេខាធិការដ្ឋាន គ.អ.ច.ទ តំណាង ឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ដែមានការចូលរួមលោកស្រី រស់ សុផានី អភិបាលរងខេត្ត តំណាង ឯកឧត្ដម សួន បវរ អភិបាលនៃគណៈអភិបាលខេត្ត រួមនឹងអ្នកពាក់ព័ន្ធបានចូលរួមនាសណ្ឋគា លី ក្រុងប៉ោយប៉ែត នៅថ្ងៃទី២៨ ខែកុម្ភៈ ឆ្នាំ២០១៩ ម្សិលមិញ ។
ឯកឧត្ដម ហោ សារុន អនុរដ្ឋលេខាធិការក្រសួងទេសចរណ៍ បានលើកឡើងថា ៖ ច្រកទ្វារព្រំដែនអន្តរជាតិប៉ោយប៉ែត គឺជាច្រកទ្វារព្រំដែនគោក និងជាច្រកសេដ្ឋកិច្ចយ៉ាងសំខាន់ ក្នុងការផ្លាស់ប្តូរទំនិញ កម្ពុជា-ថៃ ពិសេសភ្ញៀវទេសចរគ្រប់ជាតិសាសន៍បានឆ្លងកាត់ចូលមកកម្ពុជា តាមរយៈច្រកទ្វារខាងលើ ។ ជាមួយនឹងកំណើនទេសចរ ដែលបានចូលមកតាមច្រកទ្វារអន្តរជាតិប៉ោយប៉ែត លោកបានជម្រុញដល់អាជ្ញាធរ សមត្ថកិច្ចពាក់ព័ន្ធត្រូវពង្រីងលើការងារសន្តិសុខ សណ្តាប់ធ្នាប់ នៅតំបន់ច្រកព្រំដែន ដើម្បីធានាដល់អ្នកទេសចរដែលចូលមកកម្ពុជាមានទំនុកចិត្ត លើកិច្ចការការពារ សន្តិសុខ សណ្តាប់ធ្នាប់ជូនពួកគាត់។ ឯកឧត្ដមក៏បានធ្វើការណែនាំបន្ថែមដល់មន្ទីរស្ថាប័នពាក់ព័ន្ធ ត្រូវមានការសង់ទីសំចតសម្រាប់ភ្ញៀវទេសចរសម្រាកឲ្យបានសមរម្យ ទាំងការរៀបចំទីកន្លែង និងបន្ទប់ទឹកជាដើម ។ ម្យ៉ាងវិញទៀតសមត្ថកិច្ចពាក់ព័ន្ធត្រូវធ្វើការណែនាំដល់អាជីវករ អ្នកអូសរទេះដឹកត្រី ត្រូវបឈ្ឈប់ការបង្ហូរទឹកសំអុយពីត្រី នៅចំនុចព្រំដែនខាងលើ ព្រោះបង្កឲ្យមានក្លិនមិនល្អ ជាហេតុធ្វើឲ្យប៉ះពាលដល់ភ្ញៀវទេសចរណ៍ ដែលចូលមកតាមច្រកទ្វារព្រំដែនអន្តរជាតិ ដោយវាមានក្លិនមិនល្អ ។ ដោយក្នុងនោះក៏មានការរៀបចំសណ្តាបធ្នាប់ចាប់បន្ទាត់ព្រំដែន មករង្វង់ មូលថ្មី និងបន្តទៅផ្នែកខាងកើតរង្វង់មូលផងដែរ ៕មុនីរម្យ
ប្រភព៖ រដ្ឋបាលខេត្តបន្ទាយមានជ័យ