នៅព្រឹកថ្ងៃសុក្រ ១០ រោជ ខែមាឃ ឆ្នាំច សំរឹទ្ធិស័ក ពស ២៥៦២ ត្រូវនឹងថ្ងៃទី០១ ខែមីនា ឆ្នាំ២០១៩ រដ្ឋបាលខេត្តព្រះសីហនុ បានប្រារព្ធពិធីបិទសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅការងារ ឆ្នាំ២០១៩ ក្រោមអធិបតីដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ឯកឧត្តម យន្ត មីន អភិបាល ខេត្តព្រះសីហនុ បានឡើងអានរបាយការណ៍ជូនសម្តេច ដោយបានបញ្ជាក់ថា រដ្ឋបាលខេត្តព្រះសីហនុបានបំពេញការងារ ស្របតាមសេចក្ដីណែនាំរបស់រាជរដ្ឋាភិបាល និងក្រសួងមហាផ្ទៃ ដោយបានរៀបចំអង្គភាពច្រកចេញចូលតែមួយ ការិយាល័យប្រជាពលរដ្ឋ និងមន្ត្រីផ្នែកជួរក្រោយ ដែលបាននឹងកំពុងបម្រើសេវារដ្ឋបាលជូនប្រជាពលរដ្ឋប្រកបដោយប្រសិទ្ធិភាព តម្លាភាព។ ឯកឧត្តមបន្តថា រដ្ឋបាលខេត្តបានដាក់ចេញនូវទិសដៅអាទិភាពដូចជាៈ សហការឱ្យកាន់តែល្អ ជាមួយក្រុមការងារក្រសួង មហាផ្ទៃដែលបានចុះជួយគាំទ្រ និងពង្រឹងការងាររដ្ឋបាលខេត្ត និងសហការជាមួយវិស័យឯកជន ព្រមជាមួយសង្គមស៊ីវិល។ ឯកឧត្តមបន្ថែមថា ការពង្រឹងការពារសន្តិសុខ របៀបរៀបរយ សណ្តាប់ធ្នាប់សាធារណៈជូនប្រជាពលរដ្ឋ ភ្ញៀវទេសចរជាតិ អន្តរជាតិ និងវិនិយោគគិន និងការពង្រឹងការងារភូមិ ឃុំមានសុវត្ថិភាព ៩ចំណុច ត្រូវបានយកចិត្តទុកដាក់ជាប់ជាប្រចាំ និងការអនុវត្តច្បាប់ចរាចរណ៍ផ្លូវគោកដែលបានកាត់បន្ថយគ្រោះថ្នាក់ចរាចរណ៍យ៉ាងច្រើនផងដែរ។ ឯកឧត្តមបន្តថា ការផ្តល់សេវារដ្ឋបាលជូនប្រជាពលរដ្ឋ បានអនុវត្តប្រកបដោយប្រសិទ្ធិភាព តម្លាភាព និងគណនេយ្យភាព តាមរយអង្គភាពច្រកចេញ ចូលតែមួយខេត្ត ក្រុង ស្រុក ស្របតាមបាវចនាថ្មី របស់សម្តេចតេជោ នាយករដ្ឋមន្ត្រី គឺកែទម្រង់ខាងក្នុង និងពង្រីកទំនាក់ទំនងខាងក្រៅ ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ថា រដ្ឋបាលខេត្តសម្រេចបាននូវសមិទ្ធិផលជាច្រើន ពិសេសសន្តិភាព និងសុខមាលភាពសង្គម ក្នុងការអភិវឌ្ឍន៍រីកចម្រើនគួរឲ្យកត់សម្គាល់ ក្នុងការកៀងគរធនធានទុនយ៉ាងច្រើន មកធ្វើការវិនិយោគនៅខេត្តព្រះសីហនុ ហើយក៍ជាឱកាសសម្រាប់ប្រជាពលរដ្ឋខេត្តព្រះសីហនុ ក៏ដូចប្រជាពលរដ្ឋនៅទូទាំងប្រទេស ប៉ុន្តែរាល់អ្នកវិនិយោគត្រូវតែចូលរួមគោរពច្បាប់នៃព្រះរាជាណាចក្រ កម្ពុជា។ សម្ដេចក្រឡាហោម បានបន្តថា ទាក់ទងនឹងបញ្ហាវិវាទដីធ្លីដែលមានអ្នកមានអំណាច និងអ្នកលុយចូលមកធ្វើអន្តរាគមន៍នៅខេត្តព្រះសីហនុ ត្រូវតែបញ្ឈប់នូវវប្បធម៌អន្តរាគមន៍ជាបន្ទាន់ និងត្រូវដកខ្លួនចេញ ដើម្បីការពារផលប្រយោជន៍ជាតិ ពិសេសការពារដាច់ខាតនូវដីរដ្ឋ ព្រោះវាជាផលប្រយោជន៍រួមរបស់យើងទាំងអស់គ្នា ម្យ៉ាងទៀតបញ្ហាទំនាស់ដីធ្លី គឺរដ្ឋបាលខេត្តត្រូវធ្វើការដោះស្រាយប្រកបដោយយុត្តិធម៍ និងត្រូវយកច្បាប់មកអនុវត្តជាមូលដ្ឋាន៕ គឹមអាន
ប្រភព៖ រដ្ឋបាលខេត្តព្រះសីហនុ