កិច្ចប្រជុំផ្សព្វផ្សាយយុទ្ធនាការជំរឿនប្រជាជនទូទៅឆ្នាំ២០១៩ នៅខេត្តកំពង់ចាម ក្រោមអធិបតីភាពឯកឧត្តម ខ្លូត ផន ប្រធានក្រុមប្រឹក្សាខេត្ត និង ឯកឧត្តម គួច ចំរើន អភិបាលនៃគណៈអភិបាលខេត្ត និងមានការអញ្ជើញចូលរួមពីសំណាក់លោក លោកស្រី ប្រធានមន្ទីរ អង្គភាព ជុំវិញខេត្ត លោកលោកស្រី អភិបាល អភិបាលរងក្រុង-ស្រុក មេឃុំ សង្កាត់ ប្រមាណជា ២៥០នាក់ផងដែរ។

      ឯកឧត្ដម គួច ចំរើន អភិបាលខេត្តកំពង់ចាម បានជម្រុញឲ្យបណ្ដាមន្ទីរ អង្គភាព ជាពិសេស រដ្ឋបាលក្រុង ស្រុក និងរដ្ឋបាលឃុំ សង្កាត់ យកចិត្តទុកដាក់ និងដឹកនាំការងារជំរឿន នៅក្នុងមូលដ្ឋាននីមួយៗ ឲ្យបានហ្មត់ចត់បំផុត។ ការថ្លែងយ៉ាងដូច្នេះ ធ្វើឡើង ខណៈដែលឯកឧត្ដម រួមជាមួយ ឯកឧត្ដម ខ្លូត ផន ប្រធានក្រុមប្រឹក្សាខេត្ត អញ្ជើញជាអធិបតី ក្នុងកិច្ចប្រជុំផ្សព្វផ្សាយយុទ្ធនាការជំរឿនប្រជាជនទូទៅ ឆ្នាំ២០១៩ នៅខេត្តកំពង់ចាម ដែលរៀបចំឡើងដោយមន្ទីរផែនការខេត្ត នៅសាលប្រជុំសាលា ខេត្តកំពង់ចាម នៅព្រឹកថ្ងៃពុធ ៨រោច ខែមាឃ ឆ្នាំ ច សំរឹទ្ធិស័ក ពស ២៥៦២ ត្រូវនឹងថ្ងៃទី ២៧ ខែកុម្ភៈ ឆ្នាំ ២០១៩ ។

      ឯកឧត្ដម អភិបាលខេត្ត គូសបញ្ជាក់ថា ការងារជំរឿន ពិតជាមានអត្ថប្រយោជន៍ និងសារៈសំខាន់បំផុត ពីព្រោះថា ទិន្នន័យជំរឿន ជាតម្រូវការចាំបាច់បំផុត ក្នុងការធ្វើគោលនយោបាយ ការធ្វើផែនការអភិវឌ្ឍ ការធ្វើកម្មវិធីផ្សេងៗ សម្រាប់ការអភិវឌ្ឍខេត្ត ជាពិសេស ការអភិវឌ្ឍខេត្តជាតិ សម្រាប់វាយតម្លៃ ការសម្រេចគោលដៅប្រកបដោយចីរភាព និងជាសូចនាករ សម្រាប់តាមដានត្រួតពិនិត្យភាពក្រីក្រ ស្ថានភាពសេដ្ឋកិច្ច និងសង្គម ផងដែរ ។ យ៉ាងណាម៉ិញ បើយើងមានទិន្នន័យជំរឿនច្បាស់លាស់ និងល្អប្រសើរ នោះ វានឹងធ្វើឲ្យការដោះស្រាយបញ្ហានានា កាន់តែងាយស្រួល ។ ដូច្នេះ សូមឲ្យបណ្ដាមន្ទីរ អង្គភាព ជាពិសេស រដ្ឋបាលក្រុង ស្រុក និងរដ្ឋបាលឃុំ សង្កាត់ទាំងអស់ ត្រូវធ្វើការបន្តការដឹកនាំដោយផ្ទាល់ និងដោយយកចិត្តទុកដាក់ និងហ្មត់ចត់បំផុត នៅលើកិច្ចការជំរឿននេះ ដោយត្រូវចូលរួមតាមដានយ៉ាងលម្អិត និងយ៉ាងជាក់លាក់បំផុត ថ្វីត្បិតតែពេលនេះ យើងមានមន្ទីរផែនការ ជាសេនាធិការឲ្យខេត្ត ក៏ដោយ ។ អញ្ចឹងទេ! អ្នកពាក់ព័ន្ធទាំងអស់ ត្រូវធ្វើយ៉ាងណា ឲ្យលទ្ធផលទិន្នន័យ ដែលទទួលបានមកហើយ មានលក្ខណៈគ្រប់ជ្រុងជ្រោយ ត្រឹមត្រូវ និងច្បាស់លាស់ ពោលគឺ មានន័យថា បើទិន្ន័យទទួលបានច្បាស់លាស់កាលណា នោះវានឹងផ្ដល់នូវអត្ថប្រយោជន៍ កាន់តែធំ កាលនោះ ។

      គួររំលឹកថា ជំរឿនឆ្នាំ២០១៩ មានគោលបំណងដើម្បីរាប់ប្រជាជន តាមអាយុ និងភេទ ផ្ដល់របាយប្រជាជន តាមលក្ខណៈភូមិសាស្ត្រ សេដ្ឋកិច្ច សង្គម នឹងឈានទៅបង្កើតបញ្ជីសារពើភ័ណ្ឌ កម្លាំងពលកម្ម និងលក្ខណៈប្រជាសាស្ត្រ របស់ប្រទេសកម្ពុជា នៅក្នុងពេលកំណត់ និងផ្ដល់ជាស៊ុមគំរូ សម្រាប់ធ្វើអង្កេត និងធ្វើកម្មវិធីស្ថិតិផ្សេងៗ ។ ជំរឿនទូទៅប្រជាជន គឺសំដៅលើវិធីសាស្ត្រទាំងមូល នៃការប្រមូល ការចងក្រង ការវាយតម្លៃ ការវិភាគ និងការផ្សព្វផ្សាយទិន្នន័យ អំពីប្រជាជន នៃប្រទេសមួយ ។ ក្រៅពីនោះ ការងារនេះ ពាក់ព័ន្ធនឹងការចុះបញ្ជីមនុស្ស ការកត់ត្រាលក្ខណៈ របស់មនុស្សម្នាក់ៗ ក្នុងចំណោមមនុស្សទាំងអស់ តាមកាលបរិច្ឆេទកំណត់មួយ ។ ហេតុនេះ នៅពេលដែលធ្វើការចងក្រង ការវិភាគព័ត៌មាន ដែលបានមកពីជំរឿន យើងអាចដឹងពីទំហំ របាយប្រជាជន ព្រមទាំងលក្ខណៈប្រជាសាស្ត្រ សង្គម សេដ្ឋកិច្ច វប្បធម៌ នៃប្រជាជន ក៏ដូចជា ព័ត៌មានខ្លះអំពីអគារ ដែលបានកាន់កាប់ ដោយគ្រួសារ ស្ថានភាពនៅមូលដ្ឋាន និងសម្ភារៈប្រើប្រាស់ នៅក្នុងគ្រួសារ ផងដែរ ។ មួយផ្នែកទៀតនោះ ទិន្នន័យជំរឿន មានតម្រូវការចាំបាច់បំផុត ក្នុងការធ្វើគោលនយោបាយ ការធ្វើផែនការអភិវឌ្ឍ ការធ្វើកម្មវិធីផ្សេងៗ សម្រាប់ការអភិវឌ្ឍជាតិ សម្រាប់វាយតម្លៃ ការសម្រេចគោលដៅប្រកបដោយចីរភាព SDGs និងជាសូចនាករ សម្រាប់តាមដានត្រួតពិនិត្យភាពក្រីក្រ ស្ថានភាពសេដ្ឋកិច្ច និងសង្គម ផងដែរ ។

      គូសបញ្ជាក់ដែរថា ការងារជំរឿនប្រព្រឹត្តទៅ ក្នុងរយៈពេល ១០ឆ្នាំម្ដង ។ ដោយឡែក យុទ្ធនាការជំរឿនប្រជាជនទូទៅ ឆ្នាំ២០១៩នេះ គឺធ្វើឡើង នៅទូទាំងប្រទេសកម្ពុជា ដោយអនុវត្តចាប់ពី ម៉ោង ០០នាទី ថ្ងៃទី២ ឈានចូលថ្ងៃទី០៣ មីនា ឆ្នាំ២០១៩ តទៅ និងមានរយៈពេល ១៤ថ្ងៃប៉ុណ្ណោះ៕មុនីរម្យ

ប្រភព៖ រដ្ឋបាលខេត្តកំពង់ចាម