ពិធីប្រកាសនិងតែងតាំងអភិបាល អភិបាលរងស្រុកលើកដែកនេះ ត្រូវបានប្រារព្ធធ្វើ នៅសាលាស្រុកលើកដែក ក្រោមអធិបតីភាពឯកឧត្តម ម៉ៅ ភិរុណ អភិបាល នៃគណៈអភិបាលខេត្តកណ្ដាល។

       ឯកឧត្តមបណ្ឌិត ម៉ៅ ភិរុណ នាថៃ្ងទី២១ ខែកុម្ភៈ ឆ្នាំ២០១៩ បានថ្លែងការសរសើរចំពោះលទ្ធផលការងារដែលមន្ត្រីគ្រប់លំដាប់ថ្នាក់ក្នុងស្រុកសម្រេចបានធ្វើឲ្យស្រុកមានការរីកចំរើន ធ្វើអោយជីវភាពរស់នៅរបស់ប្រជាពលរដ្ឋមានភាពល្អប្រសើរក្នុងរយៈពេលប៉ុន្មានឆ្នាំកន្លងមកនេះ។ ឯកឧត្តម បានបន្តថា ការចូលនិវត្តន៍របស់មន្រ្តីរាជការគឺ ជាការអនុវត្តតាមច្បាប់របស់រាជរដ្ឋាភិបាលដែលបានកំណត់ ហើយក៏ជាការចាំបាច់ដែលត្រូវតែមានមន្ត្រីថ្មីមកជំនួសដើម្បីដឹកនាំបន្ត  ដែលនេះជាក្រឹត្យក្រមមិនអាចរំលងបាន។

      ឯកឧត្តមអភិបាលខេត្ត  បានរំលឹកដល់មន្ត្រីដែលទើបប្រកាសចូលកាន់តំណែងត្រូវអនុវត្តតាមភារកិច្ចដែលបានប្រគល់ជូន ត្រូវគោរពតាមច្បាប់លិខិតបទដ្ឋាននានា រក្សាសាមគ្គីផ្ទៃក្នុងឲ្យបានល្អ ត្រូវមានវិធីសាស្ត្រដឹកនាំដោយផ្សារភ្ជាប់ទៅនឹងសភាពការណ៍ ភូមិសាស្រ្តនៃមូលដ្ឋានរបស់ខ្លួន ចេះទំនាក់ទំនងជាមួយសប្បុរសជនក្នុង និងក្រៅ ដើម្បីអភិវឌ្ឍន៍មូលដ្ឋានពង្រឹងការទប់ស្កាត់បទល្មើសក្នុងមូលដ្ឋាន ពិសេសបទល្មើសនេសាទ។ ឯកឧត្តមបានស្នើឲ្យមន្ត្រីគ្រប់លំដាប់ថ្នាក់ពង្រឹងរបៀបរបប ធ្វើការដោយសហការគ្នាគ្រប់ផ្នែក ដើម្បីភាពរីកចំរើននិងអភិវឌ្ឍន៍របស់ស្រុកលើកដែក និងដើម្បីឆ្លើយតបដល់ប្រជាពលរដ្ឋ ដែលតែងតែមានទំនុកចិត្តមកលើការដឹកនាំរបស់រដ្ឋបាលស្រុកនិងខេត្ត។

      លោក នៅ សំណាង អភិបាលស្រុកដែលត្រូវចូលនិវត្តន៍បានធ្វើរបាយការណ៍ស្វាគមន៍ដោយបញ្ជាក់ពីសកម្មភាព និងលទ្ធផលដែលសម្រេចបានកន្លងមក ពិសេសលទ្ធផលដែលបានកើតឡើងក្រោមការដឹកនាំរបស់រដ្ឋបាលស្រុក ដែលមានលោកជាអ្នកគ្រប់គ្រងការងារបានរីកចម្រើន។

      សូមបញ្ជាក់ថា លោក ចាប ច័ន្ទវិទ្យា ត្រូវបានប្រកាសតែងតាំងជាអភិបាលស្រុកលើកដែក យោងតាមអនុក្រឹត្យរបស់រាជរដ្ឋាភិបាល លេខ ៩៤ អនក្រតត ជំនួសលោក នៅ សំណាង ដែលត្រូវចូលនិវត្តន៍ និងបានប្រកាស លោក វ៉ាត រទ្ធិ និងលោក ខឹម ច័ន្ទមរមី ជាអភិបាលរងស្រុក តាមប្រកាសរបស់ក្រសួងមហាផ្ទៃលេខ ៤៦២ ប្រក៕មុនីរម្យ

ប្រភព៖ រដ្ឋបាលខេត្តកណ្តាល