លោក អន ភារៈ អភិបាលរង នៃគណៈអភិបាលខេត្តកោះកុង អមដំណើរដោយលោកប្រធានមន្ទីរធនធានទឹក និងឧតុនិយម លោកប្រធានមន្ទីរឧស្សាហកម្ម និងសិប្បកម្មខេត្ត ព្រមទាំងមន្ត្រីជំនាញចុះពិនិត្យទីតាំងនៅចំណុចទឹកធ្លាក់សិលាមានជ័យ និងស្វែងរកប្រភពទឹក នាថ្ងៃចន្ទ ៧ កើត ខែមាឃ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី១១ ខែកុម្ភៈ ឆ្នាំ២០១៩ ដើម្បីពិនិត្យលទ្ធភាព ក្នុងការផ្គត់ផ្គង់ទឹកជូនប្រជាពលរដ្ឋ នៅក្នុងក្រុងខេមរភូមិន្ទ។

      លោកអភិបាលរងខេត្ត បានសូមឱ្យមន្ត្រីជំនាញសិក្សាឱ្យបានលម្អិត និងច្បាស់លាស់ អំពីស្ថានភាពទឹក នៅទីតាំងទឹកធ្លាក់សិលាមានជ័យនេះ តើអាចផ្គត់ផ្គង់ជូនប្រជាពលរដ្ឋ ក្នុងក្រុងខេមរភូមិន្ទបានទេ ពីព្រោះសព្វថ្ងៃ តម្រូវការទឹកប្រើប្រាស់ គឺបរិមាណច្រើន ជាមួយគ្នានេះដែរដោយសាររដូវប្រាំង មិនមានភ្លៀងកក់ខែ ហើយរោងចក្រ សហគ្រាស និងភោជនីយដ្ឋាន គេហដ្ឋានមានការរីកចម្រើនផង៕មុនីរម្យ

ប្រភព៖រដ្ឋបាលខេត្តកោះកុង