នារសៀលថ្ងៃច័ន្ទ ៧កើត ខែមាឃ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី១១ ខែកុម្ភៈ ឆ្នាំ២០១៩ នៅសាលប្រជុំសាលាខេត្ត ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានអញ្ជើញជាអធិបតីក្នុងកិច្ចប្រជុំត្រួតពិនិត្យត្រៀមរៀបចំសន្និបាតបូកសរុបលទ្ធផលការងារ ឆ្នាំ២០១៨ និង លើកទិសដៅការងារឆ្នាំ២០១៩ ដើម្បីពិនិត្យ និងពិភាក្សាលើរបាយការណ៍វឌ្ឍនភាពប្រចាំ២០១៨ របស់រដ្ឋបាលខេត្តកំពង់ស្ពឺ។

      កិច្ចប្រជុំនេះមានការចូលរួមពី លោក លោកស្រី អភិបាលរងខេត្ត លោកប្រធានសាលាដំបូងខេត្ត មេបញ្ជាការកងកម្លាំងទាំងបី លោកប្រធានពន្ធនាគារ លោក លោកស្រី ប្រធានមន្ទីរ អង្គភាព ពាក់ព័ន្ធ ជុំវិញខេត្ត លោក អភិបាល ក្រុង ស្រុក ទាំង ៨ លោកនាយករងរដ្ឋបាលខេត្ត លោក លោកស្រី នាយកទីចាត់ការទាំង៥ និងលោកប្រធានអង្គភាព ចំណុះសាលាខេត្ត។

      សូមបញ្ចាក់ថារដ្ឋបាលខេត្តកំពង់ស្ពឺគ្រោងរៀបចំពិធីសន្និបាតបូកសរុបលទ្ធផលការងារ ប្រចាំឆ្នាំ២០១៨ និងលើកទិសដៅបន្តការងារសម្រាប់អនុវត្តឆ្នាំ២០១៩ របស់រដ្ឋបាលខេត្តកំពង់ស្ពឺ នៅថ្ងៃទី ២៧ ខែកុម្ភៈ ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕ រតនា

ប្រភព៖ រដ្ឋបាលខេត្តកំពង់ស្ពឺ