ព្រឹកថ្ងៃព្រហស្បត្តិ៍ ទី ១១រោច ខែបុស្ស ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃទី៣១ ខែមករា ឆ្នាំ ២០១៩ នៅសាលប្រជុំរដ្ឋបាលខេត្តសៀមរាប មានកិច្ចប្រជុំបូកសរុបលទ្ធផលការងារ របស់ធនាគារពិភពលោក ដែលចុះត្រួតពិនិត្យ និងពិភាក្សា ទៅលើក្រុមជួយខ្លួនឯងរបស់គម្រោងលើកកម្ពស់ជីវភាពប្រជាជនក្រីក្រ(លាភ) ដែលដឹកនាំដោយ ឯកឧត្តម ងី ច័ន្ទ្រផល រដ្ឋលេខាធិការ និងជាប្រធានគម្រោងសម្របសម្រួលគម្រោងលាភ និងលោក លី សំរិទ្ធ អភិបាលរងខេត្ត ទទួលបន្ទុកគម្រោងលាភ និងមានការអញ្ជើញចូលរួមពីប្រតិភូធនាគារពិភពលោក ក្រុមការងារគម្រោងថ្នាក់ជាតិ ថ្នាក់ខេត្ត ថ្នាក់រាជធានីភ្នំពេញ ទីប្រឹក្សាគម្រោងថ្នាក់ខេត្ត ក្រសួងកសិកម្ម និងមន្ទីរកសិកម្មខេត្ត។
កិច្ចប្រជុំនេះ ប្រតិភូនៃធនាគារពិភពលោក បានថ្លែងអំណរគុណ និងកោតសរសើរចំពោះក្រុមការងារថ្នាក់ខេត្ត ដែលបានបំពេញភារកិច្ចក្នុងការអនុវត្តគម្រោងអោយដំណើរការយ៉ាងល្អ និងមានភាពរីកចម្រើនគួរអោយកត់សម្គាល់ តែទន្ទឹមនឹងនេះក៏នៅមានបញ្ហាមួយចំនួនតូច ដែលត្រូវកែសម្រួល និងជម្រុញបន្ថែមទៀត ក្នុងនោះដែរ ឯកឧត្តម រដ្ឋលេខាធិការទទួលបន្ទុកគម្រោង ក៏បានសំណូមពរដល់ក្រុមការងារទាំងអស់ ជួយផ្តល់យោបល់ និងគំនិតល្អៗ ថ្មីៗ ដើម្បីអោយគម្រោងទាំងមូលមានភាពរលូន និងទទួលបានប្រសិទ្ធភាពខ្ពស់៕មុនីរម្យ
ប្រភព៖រដ្ឋបាលខេត្តសៀមរាប