នាព្រឹកថ្ងៃពុធ ១១កើត ខែបុស្ស ឆ្នាំច សំរឹទ្ធស័ក ពុទ្ធសករាជ ២៥៦២ ត្រូវនឹងថ្ងៃទី ១៦ ខែមករាឆ្នាំ ២០១៩ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អញ្ជើញជាអធិបតីក្នុងពិធីសម្ពោធ អគារសិក្សាថ្មី ១ខ្នង មាន៣ បន្ទប់ នៅសាលាបឋមសិក្សា តាព័រ ស្ថិតក្នុងភូមិតាព័រ ១ ឃុំពង្រក្រោម ស្រុក ជីក្រែង ខេត្តសៀមរាប ។
ឯកឧត្តម គួច ចំរើន បានថ្លែងថា ទីតាំងនេះគឺជាស្រុកកំណើតរបស់ឯកឧត្តមផ្ទាល់ ដែលជាអនុស្សាវរីយ៍ ដ៏ជូជត់ឈឺចាប់មិនអាចបំភ្លេចបានក្នុងរបបប្រល័យពូជសាសន៍ ប៉ុល ពត ៣ឆ្នាំ ៨ខែ២០ថ្ងៃ ដោយក្នុងភូមិ តាព័រ១ ឃុំពង្រក្រោមនេះ គឺឪពុកបង្កើតរបស់ឯកឧត្តម ត្រូវបានពួកខ្មែរក្រហមបានយកគាត់ទៅសម្លាប់ចោល មិនថាឡើយឪពុករបស់ឯកឧត្តម សូមបីតែ ប្រជាជនទូទាំងប្រទេស ក៏ត្រូវពួករបបអាវខ្មៅនៅយកទៅសម្លាប់ ចោលប្រមាណជា ៣លាននាក់ផងដែរ។
ដោយឡែក រហូតមកដល់សព្វថ្ងៃនេះអស់រយះពេល ៤១ឆ្នាំហើយ នៅរកសាកសពឪពុករបស់ឯកឧត្តម យកមកធ្វើបុណ្យ មិនទាន់ឃើញនៅឡើយទេនេះជាការឈឺចាប់មួយដែលឯកឧត្តមមិនអាចបំភ្លេចបាន ឡើយ។
ឯកឧត្តមបានបន្ថែមទៀតថា ៤១ឆ្នាំមុនទីនេះជាកន្លែងដែលឈឺចាប់ ដិតដាម មិនអាចបំភ្លេចបាន តែ ពេលនេះទីនេះជាកន្លែងដែលកំពុងតែសប្បាយរីករាយ ជាក់ស្តែងយើងកំពុងតែធ្វើពិធីសម្ពោធអគារសិក្សាថ្មី មួយទៀតបន្ថែមពីលើអាគារសិក្សាផ្សេងទៀត។ មិនថាឡើយទីនេះ ទូទាំងប្រទេសកម្ពុជាយើងសព្វថ្ងៃបាននឹង កំពុងធ្វើការអភិវឌ្ឍលើគ្រប់វិស័យទាំងផ្នែកពុទ្ធចក្រ និងអាណាចក្រ ។
ឯកឧត្តមបានបញ្ជាក់ទៀតថា យើងត្រូវរួមគ្នារក្សាសុខសន្តិភាពនេះអោយបានគង់វង្សស្ថិតស្ថេរ ដើម្បីទុកឲ្យកូនចៅជំនាន់ក្រោយរបស់យើងទទួលបានសមិទ្ធិផល ដើម្បីជាប្រយោជន៍នៃការអភិវឌ្ឍន៍ ប្រទេសបន្តទៀត កុំឱ្យជួបការឈឺចាប់៕អែមមី
ប្រភពៈរដ្ឋបាលខេត្តកំពង់ចាម