នាព្រឹកថ្ងៃអង្គារ ១០កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែមករា ឆ្នាំ២០១៩ នៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តរតនគិរី បានរៀបចំសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅបន្តឆ្នាំ២០១៩ ដែលប្រព្រឹត្តិឡើងក្រោមអធិបតីភាពឯកឧត្តម ជី ស៊ីថា ទីប្រឹក្សាក្រសួង និងលោក យឹម ផែន អភិបាលរងខេត្តរតនគិរី ព្រមទាំងមានការចូលរួមពីប្រតិភូថ្នាក់ក្រសួង ប្រធាន អនុប្រធានមន្ទីរ អង្គភាពជុំវិញខេត្ត មន្ត្រីពាក់ព័ន្ធគ្រប់ផ្នែកនៃមន្ទីរដែនដី ។
លោក យឹម ផែន អភិបាលរងខេត្ត បានមានប្រសាសន៍បើកសន្និបាត បានផ្តល់នូវអនុសាសន៍ដើម្បីរួមចំណែកក្នុងទិសដៅការងារឆ្នាំ២០១៩ របស់មន្ទីររៀបចំដែនដី រួមមាន៖
១.ការងារសុរិយោដី៖ សុំពន្លឿនការងារចុះបញ្ជីដីធ្លី ចុះបញ្ជីដីរដ្ឋ ដីសមូហភាពរបស់បងប្អូនជនជាតិដើមភាគតិច ដោយធ្វើការសម្របសម្រួលជាមួយអាជ្ញាធរភូមិឃុំស្រុកនៃតំបន់វិនិច្ឆ័យ ដើម្បីជៀសវាងការថ្នាំងថ្នាក់ពីប្រជាពលរដ្ឋ ព្រមទាំងខិតខំដោះស្រាយវិវាទជូនប្រជាពលរដ្ឋឲ្យបានទាន់ពេលវេលា និងប្រកបដោយប្រសិទ្ធភាព។
២.ការងារលំនៅដ្ឋាន៖ អភិបាលរងខេត្ត សុំឲ្យបន្តតាមដាន ត្រួតពិនិត្យ និងធ្វើស្ថិតិប្រជាពលរដ្ឋដែលបានមករស់នៅ ធ្វើកាន់កាប់ដីសម្បទានសង្គមកិច្ចស្ថិតនៅក្នុងស្រុកកូនមុំ ព្រមទាំងបន្តការសិក្សាស្រាវជ្រាវប្រជាពលរដ្ឋដែលខ្វះដី គ្មានដី និងមានតម្រូវការដីពិតប្រាកដដើម្បីសាងសង់លំនៅឋាន និងធ្វើកសិកម្មជាលក្ខណៈគ្រួសារ។
៣.ការងាររៀបចំដែនដី នគរូបនីយកម្ម និងសំណង់៖ស្នើសុំឲ្យមន្ទីរបន្តខិតខំយកចិត្តទុកដាក់លើការងារត្រួតពិនិត្យសំណង់ និងលក្ខណៈបច្ចេកទេសសំណង់ ព្រមទាំងសោភណ្ឌភាព សណ្តាប់ធ្នាប់នៃសំណង់ និងបន្តត្រួតពិនិត្យសំណង់ខុសច្បាប់ ដោយផ្សារភ្ជាប់ជាមួយការងារផ្សព្វផ្សាយលិខិតបទដ្ឋានគតិយុត្តជាធរមាន។
សូមបញ្ជាក់ថា សន្និបាតនេះប្រារព្ធធ្វើឡើងរយៈពេលពេញមួយថ្ងៃ ដោយអង្គសន្និបាតនឹងមានបទអន្តរាគមន៍ពីការិយល័យរៀបចំដែនដី នគរូបនីយកម្ម សំណង់ និងភូមិបាលក្រុង ស្រុកជុំវិញខេត្ត ហើយអង្គសន្និបាតនឹងប្រារព្ធពិធីបិទនារសៀលថ្ងៃដដែលក្រោមវត្តមានឯកឧត្តម ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់៕អែមមី
ប្រភពៈរដ្ឋបាលខេត្តរតនគិរី