ប្រជាពលរដ្ឋដែលប្ដឹងតវ៉ាទាមទារដី បានអបអរសាទរចំពោះអាជ្ញាធរខេត្តក្រចេះ ដែលបានជួយដោះស្រាយលើករណីវិវាទដីធ្លី និងបានចុះបង្ហាញទីតាំងដី សម្រាប់គោលដៅសម្បទានសង្គមកិច្ច ដល់ប្រជាពលរដ្ឋ ក្នុងចំណុចដីសម្បទានសេដ្ឋកិច្ច ក្រុមហ៊ុនចំការកៅស៊ូមេមត់ ដែលស្ថិតក្នុងឃុំ២ធ្នូ ស្រុកស្នួល ខេត្តក្រចេះ។  ការចុះបង្ហាញទីតាំងដី សម្រាប់គោលដៅសម្បទានដីសង្គមកិច្ចនេះ ធ្វើឡើងក្រោមការដឹកនាំរបស់ឯកឧត្តម បេងហុងសុជាតិខេមរ៉ូ អគ្គនាយកលំនៅឋាន នៃក្រសួងរៀបចំដែនដី នគរូបនីយកម្ម និងសំណង់ ដោយមានការចូលរួមពីលោក ខ័ណ្ឌ ចំណាន អភិបាលរងខេត្តក្រចេះ ទទួលបន្ទុកដីធ្លី និងមានការចូលរួមពីមន្ទីរ អង្គភាពពាក់ព័ន្ធ។ 

      ជាមួយគ្នានេះដែរ ដីសម្បទានសង្គមកិច្ច ដែលអាជ្ញាធរ បានចុះមកបង្ហាញទីតាំងដី ដែលត្រៀមសម្រាប់ចែកជូនជូនមុខសញ្ញាអ្នកទទួលដី ក្នុងចំណុចដីសម្បទានសេដ្ឋកិច្ចក្រុមហ៊ុនចំការកៅស៊ូមេមត់ ចំនួន២ទីតាំង ប្រហែលជា ២.៤០០ហិចតា និងត្រូវចែកជូនបន្ទាប់ពីមន្ត្រីជំនាញ និងអាជ្ញាធរ ចុះសិក្សាវាយតម្លៃពីជីវភាពរស់នៅជាក់ស្ដែងរបស់ប្រជាពលរដ្ឋ ដើម្បីក្លាយទៅជាមុខសញ្ញាអ្នកទទួលដីសម្បទានសង្គមកិច្ចស្របច្បាប់ និងតាមនីតិវិធីសម្បទានដីសង្គមកិច្ច៕អែមមី 
ប្រភពៈរដ្ឋបាលខេត្តក្រចេះ