លោក សុខ រស់ អភិបាលរងខេត្តស្វាយរៀង តំណាងឯកឧត្តម ម៉ែន វិបុល អភិបាលខេត្ត បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាលក្រុងស្វាយរៀង កាលពីរសៀលថ្ងៃព្រហស្បតិ៍ ៥រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែធ្នូ ឆ្នាំ២០១៨។ ពិធីនេះក៏មានការអញ្ជើញចូលរួមពីសំណាក់លោកស្នងការរងនគរបាលខេត្ត លោកប្រធានមន្ទីរ-អង្គភាព លោកនាយកទីចាត់ការគ្រប់គ្រងធនធានមនុស្សសាលាខេត្ត លោក លោកស្រី ជាក្រុមប្រឹក្សាក្រុង គណៈអភិបាលក្រុង តំណាងកងកម្លាំងទាំងបី ប្រធានការិយាល័យ មន្ត្រីរាជការចំណុះសាលាក្រុងទាំងអស់ និងចៅសង្កាត់ទាំង ៧ ក្នុងក្រុង ពិធីនេះប្រព្រឹត្តទៅនៅសាលប្រជុំសាលាក្រុងស្វាយរៀង។
នៅក្នុងឱកាសនោះ លោកអភិបាលរងខេត្តបានលើកឡើងថា ការតែងតាំងមុខតំណែងនៅថ្ងៃនេះ គឺជាដំណើរការរដ្ឋបាលធម្មតា ក្នុងការរៀបចំមុខតំណែងមន្ត្រីរាជការក្នុងមុខងារសាធារណៈ ស្របទៅតាមគោលការណ៍គ្រប់គ្រងរបស់រដ្ឋបាលថ្នាក់ក្រោមជាតិ ច្បាប់ និងលិខិតបទដ្ឋានគតិយុត្តជាធរមាន ដោយត្រូវបានតែងតាំងលោក សរ សុដានី ជាអភិបាលរងក្រុងស្វាយរៀង ជាមួយគ្នានេះ តាងនាមឯកឧត្ដមអភិបាលខេត្ត លោក សុខ រស់ អភិបាលរងខេត្ត ក៏បានផ្ដាំផ្ញើនូវកិច្ចការសំខាន់ៗមួយចំនួនដល់អភិបាលរងក្រុង ដែលទើបប្រកាសចូលកាន់មុខតំណែង និងមន្ត្រីរាជការសាលាក្រុងទាំងអស់ ត្រូវខិតខំពង្រឹងសាមគ្គីភាព ឯកភាពផ្ទៃក្នុងឲ្យបានល្អ ដោយមានការបែងចែកការងារទទួលខុសត្រូវ ឲ្យបានច្បាស់លាស់ ធ្វើយ៉ាងណារួមគ្នាអភិវឌ្ឍន៍ក្រុងឲ្យកាន់តែមានការរីកចម្រើន ជាមួយនិងសន្តិសុខសុវត្ថិភាពសង្គមល្អប្រសើរ ឆ្លើយតបទៅនឹងសេចក្តីត្រូវការ និងសំណូមពរជាក់ស្តែងពិតប្រាកដរបស់ប្រជាពលរដ្ឋ៕ រតនា
ប្រភព៖ រដ្ឋបាលខេត្តស្វាយរៀង