ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង កាលពីថ្ងៃសុក្រ ៧កើត ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៤ ខែធ្នូ ឆ្នាំ២០១៨ម្សិលមិញនេះ នៅសាលប្រជុំសាលាខេត្តកំពង់ឆ្នាំង បានជួបប្រជុំពិភាក្សាជាមួយ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ជុំវិញបញ្ហា​បិទតារាងបាល់មុខសាលាខេត្ត។ នៅក្នុងជំនួបពិភាក្សានោះ ក៏មានវត្តមានចូលរួមពីឯកឧត្តម អនុរដ្ឋលេខាធិការ អគ្គនាយក អគ្គនាយករង លោក លោកស្រីនៃក្រសួងអប់រំយុវជន និងកីឡា លោកអភិបាលរងខេត្ត និងស្ថាប័នពាក់ព័ន្ធ។

     ជាលទ្ធផលនៃកិច្ចពិភាក្សា អង្គប្រជុំទទួលបាន ២ចំណុច ដូចខាងក្រោម៖ ១. តារាងបាល់មុខសា​លាខេត្ត អនុញ្ញាតឱ្យប្រើប្រាស់តែកម្មវិធីកីឡាថ្នាក់ជាតិ ឬកម្មវិធីធំៗ តែប៉ុណ្ណោះ។ ដោយឡែក ការហាត់សម ឬលេងល្មមៗ តម្រូវឱ្យប្រើប្រាស់នៅទីលានផ្សេងមួយទៀត(កីឡាដ្ឋាន) ដែលមានទីតាំងនៅជិតវត្តធម្មយុត្តិសង្កាត់ប្អេរ។ ២. តារាងបាល់មុខសាលាខេត្ត ត្រូវរៀបចំដាក់សំណាញ់ ព័ទ្ធជុំវិញ ដើម្បីបញ្ចៀសគ្រោះថ្នាក់ផ្សេងៗ ជាយថាហេតុ ដល់អ្នកធ្វើដំណើរ៕សិដ្ឋ

ប្រភព៖ រដ្ឋបាលខេត្តកំពង់ឆ្នាំង