នាព្រឹកថ្ងៃព្រហស្បតិ៍ ៦ កើត ខែមិគសិរ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី១៣ ខែធ្នូ ឆ្នាំ២០១៨ ខេត្តកោះកុង បានរៀបចំពិធីដាំដើមឈើអនុស្សាវរីយ៍ នៅសួនទេសចរណ៍បឹងកាយ៉ាក់ ឃុំពាមក្រសោប ស្រុកមណ្ឌលសីមា ខេត្តកោះកុង ក្រោមអធិបតីភាព ឯកឧត្តម ថោង ខុន រដ្ឋមន្ត្រីក្រសួងទេសចរណ៍ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង និងឯកឧត្តម Bruno Bodard អគ្គនាយកក្លឹបឆ្នេរសមុទ្រដែលស្អាតជាងគេបំផុតលើសកលលោក ព្រមទាំងមានការចូលរួមពីថ្នាក់ដឹកនាំតំណាងក្រសួងស្ថាប័នពាក់ព័ន្ធ អាជ្ញាធរមូលដ្ឋាន ប្រតិបត្តិករទេសចរណ៍ សិស្សានុសិស្ស និងភ្ញៀវទេសចរយ៉ាងច្រើនកុះករ។ ការរៀបចំពិធីដាំដើមឈើនេះគឺដើម្បីអបអរសាទរ ពិធីបុណ្យសមុទ្រលើកទី៧ ជុំទី២ (ដែលនឹងប្រព្រឹត្តទៅចាប់ពីថ្ងៃទី ១៤-១៦ ខែធ្នូ ឆ្នាំ២០១៨ នៅខេត្តកោះកុង) និងដើម្បីចូលរួមលើកកម្ពស់ការយល់ដឹង និងការថែរក្សា ការពារ និងអភិរក្សធនធានធម្មជាតិ ពិសេសព្រៃកោងកាង អោយស្ថិតនៅគង់វង្ស សំដៅផ្តល់ផលប្រយោជន៍ដល់វិស័យទេសចរណ៍ បរិស្ថាន និងសេដ្ឋកិច្ចនៅតំបន់ឆ្នេរ ខេត្តកោះកុង៕ រតនា
ប្រភព៖ រដ្ឋបាលខេត្តកោះកុង