លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ខេត្តសៀមរាប បាននឹងកំពុងធ្វើការអភិវឌ្ឍន៍ តាមរយៈការកសាង កែលម្អរ នូវហេដ្ឋារចនាសម្ព័ន្ធគ្រប់ផ្នែក ដើមី្បបំពេញសេចក្តីត្រូវការរបស់ ប្រជាពលរដ្ឋ និង ភ្ញៀវទេសចរណ៍ជាតិ អន្តរជាតិ ហើយក៏ជាគោលដៅរបស់ភ្ញៀវទេសចរណ៍នៅលើពិភពលោក ចូលមកទស្សនាកម្សាន្ត។ លោកមានប្រសាសន៍ដូចនេះ ក្នុងពិធីបញ្ចុះបឋមសិលាសាងសង់ស្ពានឆ្លងកាត់ស្ទឹងសៀមរាកាលពីថ្ងៃទី១០ ខែ ធ្នូ ឆ្នាំ២០១៨កន្លងទៅនេះ។
លោក ពិន ប្រាកដ ក៏បានគូសបញ្ជាក់ថា ស្ពានថ្មមួយនេះ ក្នុងគោលបំណងពង្រឹងនូវហេដ្ឋារចនាសម្ព័នរូបវ័ន្តរបស់ខេត្ត ក្នុងស្ថានភាពបច្ចុប្បន្ន សេដ្ឋកិច្ច មនុស្ស និង ការកើនឡើងចរាចរណ៍យ៉ាងគំហុក ព្រមទាំងកាត់បន្ថយការលំបាករបស់ប្រជាពលរដ្ឋ និង ជួយសម្រួលការកកស្ទះចរាចរណ៍ដឹកជញ្ជូន ព្រមទាំងលើកនូវសោភណ្ឌភាពដងស្ទឹងប្រវត្តិសាស្ត្រឲ្យស្រស់ត្រកាលទៀតផង ។
លោកក៏បានលើកឡើងផងដែរ អំពីសមិទ្ធិផលស្ពានថ្មនេះ គឺកើតឡើងក្រោមដំបូលសន្តិភាព នៃគោលនយោបាយឈ្នះៗរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានធ្វើឲ្យកម្ពុជា មានភាពស្មើមុខស្មើមាត់នៅក្នុងតំបន់ ក៏ដូចនៅលើពិភពលោក និង បានធ្វើឲ្យការអភិវឌ្ឍន៍ប្រទេសជាតិមានការរីកចម្រើន៕គឹមអាន
ប្រភព៖ រដ្ឋបាលខេត្តសៀមរាប
