ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី កាលពីព្រឹកថ្ងៃចន្ទ ៣កើត ខែមិគសិរ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី១០ ខែធ្នូ ឆ្នាំ២០១៨ បានអញ្ជើញជាអធិបតី ក្នុងការបើកហិបវិញ្ញាសារប្រឡង ក្របខ័ណ្ឌមន្ត្រីនគរបាលជាតិ នៃស្នងការដ្ឋាននគរបាលខេត្តមណ្ឌលគិរី ដែលប្រព្រឹត្តទៅនៅមណ្ឌលវិទ្យាល័យហ៊ុន សែន មណ្ឌលគិរី។
ឯកឧត្តម អភិបាលខេត្ត បានឲ្យដឹងថា វិញ្ញាសារប្រឡងនេះ ត្រូវបានរៀបចំដោយគណៈកម្មការកណ្តាល នៃគណៈរៀបចំការប្រឡងរបស់ក្រសួងមហាផ្ទៃ និងដោយមានការចាត់តាំងពីមន្ត្រីនគរបាល ក្រសួងមហាផ្ទៃ បាននាំយកវិញ្ញសារមកប្រឡង។
ឯកឧត្តម បន្ថែមថា វិញ្ញាសារប្រឡងនេះ ត្រូវបានចាក់សោរដាក់ក្នុងហិប និងបិទជិតពុំមានការរហែក ឫបែកធ្លាយទៅណានោះឡើយ ក្នុងនោះក៏ត្រូវបានបេក្ខជន បេក្ខនារី និងគណៈកម្មការប្រយោគចូលរួមជាសាក្សីផងដែរ។ ឯកឧត្តម អភិបាលខេត្ត ក៏បានផ្តាំផ្ញើដល់បេក្ខជន បេក្ខនារីទាំងអស់ ដែលត្រូវប្រឡង គឺត្រូវអនុវត្តតាមនូវបទបញ្ជាផ្ទៃក្នុងឲ្យបានល្អ មិនត្រូវពិភាក្សាគ្នា ឬលួចចម្លង ឬគូសសញ្ញាសំគាល់លើក្រដាសវិញ្ញាសារ និងមិនត្រូវយកឧបករណ៍អេឡិចត្រូនិចចូលក្នុងបន្ទប់ប្រឡងនោះឡើយ។
យោងតាមការបញ្ជាក់របស់ស្នងការនគរបាលខេត្តមណ្ឌលគិរី លោកឧត្តមសេនីយ៍ទោ ឡោ សុខា បានឲ្យដឹងថា ខេត្តមណ្ឌលគិរី មានបេក្ខជន បេក្ខនារីដែលដាក់ពាក្យប្រឡងក្របខ័ណ្ឌមន្រ្តីនគរបាលជាតិ នៃស្នងការដ្ឋាននគរបាលខេត្តចំនួន ២៥២នាក់ ស្រី៧៨នាក់ ក្នុងនោះអវត្តមាន០៦នាក់ និងមានបន្ទប់ប្រឡងចំនួន១១បន្ទប់ និងមណ្ឌលប្រឡងចំនួន១។
លោកឧត្តមសេនីយ៍ទោ បន្ថែមថា ក្នុងចំណោមបេក្ខជនទាំងអស់ចំនួន២៥២នាក់ គឺត្រូវជ្រើសរើសយកបេក្ខជន តែចំនួន៦០នាក់ទេ ដើម្បីចូលបម្រើការងារក្នុងក្របខ័ណ្ឌមន្ត្រីនគរបាលជាតិ នៃស្នងការដ្ឋាននគរបាលខេត្តមណ្ឌលគិរី ហើយការប្រឡងប្រព្រឹត្តទៅពេញ១ព្រឹក លើវិញ្ញាសារចំនួនពីរ ទី១.កិច្ចការនគរបាល និងចំណេះដឹងទូទៅ៕ អែមមី
ប្រភពៈ រដ្ឋបាលខេត្តមណ្ឌលគិរី