ព្រឹកថ្ងៃអង្គារ ១២រោច ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៤ ខែធ្នូ ឆ្នាំ២០១៨ ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញជាអធិបតី ក្នុងពិធីប្រកាសចូលកាន់មុខតំណែង អភិបាល នៃគណៈអភិបាលស្រុកបាណន់ ខេត្តបាត់ដំបង នៅសាលប្រជុំសាលាស្រុកបាណន់ ដោយមានការចូលរួមពី លោក លោកស្រី ប្រធានមន្ទីរ អង្គភាព នានាជុំវិញខេត្ត ក្រុមប្រឹក្សាស្រុក គណៈអភិបាលស្រុក មន្ត្រីរាជការ កងកម្លាំងប្រដាប់អាវុធ អាជ្ញាធរមូលដ្ឋាន ភូមិ ឃុំ ។ 

         ឯកឧត្តម អភិបាល នៃគណៈអភិបាលខេត្តបានផ្តាំផ្ញើដល់លោកអភិបាលស្រុកបាណន់ទើបប្រកាស​ឡើងកាន់មុខតំណែងថ្មីនេះ ត្រូវមានសាមគ្គីភាពផ្ទៃក្នុងល្អ ខិតខំធ្វើការបំរើប្រជាពលរដ្ឋក្នុងស្រុក ពិសេសការបម្រើសេវារដ្ឋបាលសាធារណ:ទូទៅជូនពួកគាត់ឲ្យបានល្អ និងយកចិត្តទុកដាក់។ ឯកឧត្តម ក៏បានថ្លែងអំណរគុណនិង កោតសរសើរព្រមទាំងវាយតម្លៃខ្ពស់ចំពោះថ្នាក់ដឹកនាំមន្រ្តីរាជការសាលាស្រុកទាំងអស់ពិសេសលោកអភិបាលស្រុកចាស់ដែលបានខិតខំធ្វើការបំរើប្រជាពលរដ្ឋបានល្អរហូតដល់អាយុត្រូវបានចូលនិវត្តន៍នាពេលនេះផងដែរ។

         សូមជម្រាបថា ត្រូវបានប្រកាសតែងតាំង លោក ប៉ែន សារិយូ អភិបាលរង នៃគណៈអភិបាលស្រុកបាណន់ ជាអភិបាល នៃគណៈអភិបាលស្រុកបាណន់ ជំនួសលោក ជុំ ញ៉ ដែលត្រូវចូលនិវត្តន៍ ៕គឹមអាន

ប្រភព៖ រដ្ឋបាលខេត្តបាត់ដំបង