រដ្ឋបាលខេត្តសៀមរាប បានរៀបចំវេទិកាផ្សព្វផ្សាយ និងពិគ្រោះយោបល់ អាណត្តិទី២ ឆ្នាំ២០១៨ នៅស្រុកបន្ទាយស្រី ក្រោមអធិបតីភាពឯកឧត្តម អ៊ឹង ហឿន ប្រធានក្រុមប្រឹក្សាខេត្ត កាលពីព្រឹកថ្ងៃព្រហស្បតិ៍ ៨រោច ខែកត្តិក ឆ្នាំច សំរឹទ្ធិស័ក ព.ស ២៥៦២ត្រូវនឹងថ្ងៃទី២៩ ខែវិចិ្ឆកា ឆ្នាំ២០១៨ ដោយមានការចូលរួមដោយលោក សុខ ថុល នាយករដ្ឋបាលសាលាខេត្ត លោក ម៉ី ម៉ារ៉ាឌី ទីប្រឹក្សា អាជ្ញាធរជាតិអប្សរា ព្រមទាំង ថ្នាក់ដឹកនាំមន្ទីរ អង្គភាព តំណាងអង្គការសង្គមស៊ីវិល សិស្សានុសិស្ស អាជ្ញាធរ និង ប្រជាពលរដ្ឋមកពីស្រុកបន្ទាយស្រី ស្រុកវ៉ារិន និង ស្រុកអង្គរជុំ ចំនួន៧៦៩ នាក់ ស្រ្តី ២៤៨នាក់ ។
វេទិកានេះរៀបចំឡើងក្នុងគោលបំណង ដើមី្បផ្តល់ឱកាសជូនដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ ដែលបាន មកពីក្រុង ស្រុកទាំងបី បានស្វែងយល់ពីស្ថានភាពទូទៅ នៃការអភិវឌ្ឍខេត្ត ក្រុង ស្រុក ឃុំ សង្កាត់ និងបញ្ហាប្រឈមដែលកើតកន្លង ហើយវេទិកានេះ នឹងផ្តល់ឱកាសក្នុងការបញ្ចេញមតិយោបល់របស់ខ្លួនពាក់ព័ន្ធនឹងកង្វល់ សំណូមពរ តម្រូវការជាក់ស្តែងក្នុងមូលដ្ឋានផងដែរ។ ជាមួយគ្នានោះដែរ ប្រជាពលរដ្ឋបានលើកឡើងនូវសំណួរ សំណូមពរ តាមមូលដ្ឋាន ដោយផ្តោតទៅលើ បញ្ហាដីធ្លី ប័ណ្ណសម្គាល់កម្មសិទ្ធិដីធ្លី , អគ្គិសនី , ការងារអប់រំ និង សាសនា ។ បន្ទាប់ពីការបកស្រាយបំភ្លឺរបស់បណ្តាមន្ទីរ អង្គភាពពាក់ព័ន្ធ បានធ្វើឲ្យអាជ្ញាធរខេត្ត បានយល់កាន់តែច្បាប់រាល់ការអភិវឌ្ឍន៍របស់រាជរដ្ឋាភិបាល ក៏ដូចអាជ្ញាធរមូល ដឹងពីទុក្ខកង្វល់របស់ប្រជាពលរដ្ឋនៅតាមមូលដ្ឋាន និងតម្រូវការចាំបាច់របស់ប្រជាពលរដ្ឋផងដែរ។
ឯកឧត្តម អ៊ឹង ហឿន គូសបញ្ជាក់ថា ការបញ្ចេញមតិយោបល់របស់ប្រជាពលរដ្ឋនេះជាកម្លាំងចលករជម្រុញឲ្យការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិកាន់តែមានល្បឿនទៅមុខឥតឈប់ឈរ ហើយក៏ជាកាយវិការដ៏ប្រពៃសំដៅធ្វើឲ្យថ្នាលនៃលទ្ធិប្រជាធិបតេយ្យនៅកម្ពុជា កាន់តែចាក់ឬសយ៉ាងជ្រៅ នៅតាមសហគមមូលដ្ឋានរបស់យើង ហើយវាក៏ជាយន្តការមួយក្នុងការពង្រឹងនីតិរដ្ឋ និង អភិបាលកិច្ចល្អនៅមូលដ្ឋាន៕គឹមអាន
ប្រភព៖រដ្ឋបាលខេត្តសៀមរាប