នាព្រឹកថ្ងៃព្រហស្បតិ៍ ០៧រោច ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៨នេះ ឯកឧត្តម សុខ លូ អភិបាលខេត្តកំពង់ធំ និងសហការី ព្រមទាំងអាជ្ញាធរស្រុកបារាយណ៍ បានចុះត្រួតពិនិត្យស្ថានភាព ការបង្ករបង្កើនផលស្រូវប្រដេញទឹករបស់បងប្អូនកសិករនៅឃុំបារាយណ៍ និងឃុំទ្រៀល ស្រុកបារាយណ៍ សរុបប្រមាណជិត ៤ពាន់ហិកតា ដែលជួបប្រទះគ្រោះរំាងស្ងួត ស្រូវមានសភាពក្រៀមស្វិតស្រពោន ដោយសារខ្វះទឹកកន្លងមក។ ជាមួយគ្នានោះ ក៏មានការជួយអន្តរាគមន៍ពីថ្នាក់ដឹកនាំខេត្តបានទាន់ពេលវេលា ដោយបានជួយសង្គ្រោះស្រូវ ផ្តល់នូវម៉ាស៊ីនបូមទឹក និងប្រេងម៉ាស៊ូត សម្រាប់បូមទឹកពីកន្លែងមួយទៅកន្លែងមួយទៀត ដែលបង្កភាពងាយស្រួលដល់ប្រជាកសិករបូមទឹកបញ្ចូលស្រែ ស្របពេលដែលមានភ្លៀងធ្លាក់ជាប់គ្នាប៉ុន្មានថ្ងៃនេះ ដោយសារឥទ្ធិពលនៃព្យុះទីហ្វុងយូសាជិ (Usagi) ឃើញថាមានទឹកគ្រប់គ្រាន់ ស្រូវប្រែពណ៌ខៀវស្រងាត់ ស្រស់បំព្រង ដែលធ្វើឲ្យប្រជាកសិករមានទឹកមុខសប្បាយរីករាយ និងមានក្តីសង្ឃឹមឡើងវិញ។ តាមការចុះពិនិត្យជាក់ស្តែងនៅថ្ងៃនេះ រដ្ឋបាលខេត្តកំពង់ធំ សង្កេតឃើញថា ស្រូវពង្រោះទាំងអស់នោះមានទឹកគ្រប់គ្រាន់ និងមានការលូតលាស់ខៀវខ្ចីវិញហើយ។ នៅក្នុងឱកាសនេះ ឯកឧត្តម អភិបាលខេត្ត បានណែនាំទៅអាជ្ញាធរស្រុក ក៏ដូចជាប្រជាកសិករ ជួយផ្សព្វផ្សាយដល់ប្រជាកសិករយើងបន្តទៀត ឲ្យចេះប្រើប្រាស់ទឹក គ្រប់គ្រងទឹក ប្រកបដោយប្រសិទ្ធិភាព ហើយសង្ឃឹមថា ប្រជាកសិករយើង នឹងទទួលបានទិន្នផលល្អផងដែរ៕ អែមមី
ប្រភពៈ រដ្ឋបាលខេត្តស្វាយរៀង