ថ្ងៃអង្គារ ៦កើត ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៣ ខែវិច្ឆិកា ឆ្នាំ២០១៨ ឯកឧត្តម ជា សុមេធី អភិបាលខេត្តព្រៃវែង បានអញ្ជើញជាអធិបតីភាព ក្នុងពិធីបិទការប្រណាំងទូកង ខេត្តព្រៃវែង ឆ្នាំ២០១៨ នៅតំបន់ទីប្រជុំជនអ្នកលឿងត្រើយខាងកើត ស្ថិតក្នុងឃុំព្រែកខ្សាយ ខ ស្រុកពាមរក៏ ខេត្តព្រៃវែង ។

​     ក្នុងឱកាសនេះ ឯកឧត្តម អភិបាលខេត្ត បានថ្លែងអំណរគុណចំពោះ សម្តេចក្រឡាហោម ស ខេង ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ដែលជានិច្ចកាល តែងតែបានជួយឧបត្ថម្ភគាំទ្រ ទាំងស្មារតី សម្ភារៈ និងថវិកា ធ្វើអោយការប្រណាំងទូក ង របស់ខេត្តព្រៃវែង ប្រព្រឹត្តទៅដោយជោគជ័យគួរជាទីមោទនៈបំផុត ។ ទន្ទឹមនឹងនេះផងដែរ ក្នុងនាមរដ្ឋបាលខេត្តព្រៃវែង ឯកឧត្តម អភិបាលខេត្ត ព្រមទាំងលោកជំទាវ ក៏សូមថ្លែងអំណរគុណ ចំពោះ ឯកឧត្តម លោកជំទាវ លោកឧកញ៉ា លោក លោកស្រី និងថ្នាក់ដឹកនាំមន្ទីរ អង្គភាពមន្ត្រីរាជការ កងកម្លាំងប្រដាប់អាវុធ និងសប្បុរសជនទាំងអស់ ដែលបានជួយឧបត្ថម្ភគាំទ្រ ជាសម្ភារៈ និងថវិកា ដល់កម្មវិធីប្រណាំងទូក ង ខេត្តព្រៃវែង និងថ្លែងអំណរគុណដល់សហភាពសហព័ន្ធយុវជនកម្ពុជា និងគណៈកម្មការរៀបចំពិធីប្រណាំងទូក ដែលបានយកអស់កំលាំងកាយកំលាំងចិត្ត ប្រាជ្ញាស្មារតី ប្រកបដោយការទទួលខុសត្រូវ និងច្នៃប្រឌិតខ្ពស់ ធ្វើអោយពិធីប្រណាំងទូក ង ខេត្តព្រៃវែង ឆ្នាំ២០១៨ ដំណើការទៅបាន ប្រកបដោយភាពអធិកអធម សប្បាយរីករាយ ធានាបាននូវសន្តិសុខ សណ្នាប់ធ្នាប់សាធារណៈ របៀបរៀបរយ ចរាចរណ៍ និងសុវត្តិភាពជូនបងប្អូនប្រជាពលរដ្ឋ ដែលមកទស្សនាកំសាន្តបានល្អប្រសើរ។ ជាទីបញ្ចប់ សូមគោរពជូនពរ ឯកឧត្តម លោកជំទាវ លោកឧកញ៉ា លោក លោកស្រី បងប្អូនប្រជាពលរដ្ឋ ទាំងអស់ និងកីឡាករ អោយទទួលបាននូវសុខភាពល្អបរិបូណ៌ ជោគជ័យ សិរីសួស្ដី វិបុលសុខគ្រប់ប្រការ កុំបីឃ្លៀងឃ្លាតឡើយ ។អេមី

ប្រភព៖រដ្ឋបាលខេត្តព្រៃវែង